24 കോടി നിക്ഷേപക അക്കൗണ്ടുകളുമായി എൻ.എസ്.ഇ കുതിപ്പ്

കൊച്ചി- നാഷണൽ സ്റ്റോക്ക് എക്‌സ്‌ചേഞ്ച് (എൻ.എസ്.ഇ) 24 കോടി വ്യാപാര അക്കൗണ്ടുകൾ നേടി ചരിത്രം സൃഷ്ടിച്ചുവെന്ന് ചീഫ് ബിസിനസ് ഡെവലപ്പ്‌മെന്റ് ഓഫീസർ ശ്രീറാം കൃഷ്ണൻ പറഞ്ഞു. കഴിഞ്ഞ വർഷം ഒക്ടോബറിൽ 20 കോടി അക്കൗണ്ടുകൾ നേടി ഒരു വർഷത്തിനുള്ളിലാണ് ഉപഭോക്താക്കളുടെ എണ്ണത്തിൽ വൻ കുതിപ്പ് കൈവരിച്ചത്. നാല് കോടിയിലധികം നിക്ഷേപക അക്കൗണ്ടുകളുമായി (17% വിഹിതം) മഹാരാഷ്ട്രയാണ് ഒന്നാമത്. ഉത്തർപ്രദേശ് (2.7 കോടി, 11% വിഹിതം), ഗുജറാത്ത് (2.1 കോടി, 9% വിഹിതം), പശ്ചിമ ബംഗാൾ (1.4 കോടി, 6% വിഹിതം), രാജസ്ഥാൻ (1.4 കോടി, 6% വിഹിതം) എന്നിവരാണ് നിക്ഷേപകരുടെ എണ്ണത്തിൽ മുന്നിലുള്ള മറ്റ് സംസ്ഥാനങ്ങൾ.

കഴിഞ്ഞ അഞ്ച് വർഷത്തിൽ നിഫ്റ്റി 50, നിഫ്റ്റി 500 സൂചികകൾ യഥാക്രമം 15%, 18% എന്നിങ്ങനെ ശക്തമായ വാർഷിക വരുമാനം സൃഷ്ടിച്ചിരിന്നു. ഓഹരികൾ, ബാധ്യതാ സുരക്ഷിതത്വങ്ങൾ, എക്‌സ്‌ചേഞ്ച്-ട്രേഡഡ് ഫണ്ടുകൾ, റിയൽ എസ്റ്റേറ്റ് നിക്ഷേപ ട്രസ്റ്റുകൾ,അടിസ്ഥാന സൗകര്യ നിക്ഷേപ ട്രസ്റ്റുകൾ,ഗവൺമെന്റ് ബോണ്ടുകൾ എന്നിവയിൽ നിക്ഷേപിക്കുന്നവരാണ് പ്രധാനമായി അക്കൗണ്ടുകൾ തുറന്നത്.