പ്രധാനമന്ത്രി മോദിയുടെ ബയോപിക്: നിർണായക വേഷത്തിൽ രവീണ ടണ്ടൻ; നായകനായി ഉണ്ണി മുകുന്ദൻ

പ്രധാനമന്ത്രി നരേന്ദ്ര മോദിയുടെ ജീവിതം ആസ്പദമാക്കി ഒരുങ്ങുന്ന ഉണ്ണിമുകുന്ദൻ കേന്ദ്ര കഥാപാത്രമായി എത്തുന്ന 'മാ വന്ദേ' എന്ന ചിത്രത്തിൽ ബോളിവുഡ് നടി രവീണ ടണ്ടൻ പ്രധാന കഥാപാത്രത്തെ അവതരിപ്പിക്കും. മോദിയുടെ അമ്മയായ ഹീരാബെൻ മോദിയുടെ വേഷത്തിലാകും രവീണ ടണ്ടൻ എത്തുക. യുവതാരം ഉണ്ണി മുകുന്ദനാണ് നരേന്ദ്ര മോദിയായി വേഷമിടുന്നത്. ക്രാന്തി കുമാർ സി.എച്ച് ആണ് സിനിമ സംവിധാനം ചെയ്യുന്നത്.

നരേന്ദ്ര മോദിയുടെ കുട്ടിക്കാലം മുതൽ രാജ്യത്തിന്റെ പ്രധാനമന്ത്രി പദത്തിൽ എത്തുന്നതുവരെയുള്ള ജീവിതമാണ് 'മാ വന്ദേ'യുടെ പ്രമേയം. യഥാർത്ഥ സംഭവങ്ങളെ അടിസ്ഥാനമാക്കിയുള്ള സിനിമയിൽ, അമ്മ ഹീരാബെൻ മോദിയുമായി മോദിക്കുണ്ടായിരുന്ന ആഴമുള്ള ബന്ധത്തിനാണ് പ്രാധാന്യം നൽകുക. മികച്ച വിഎഫ്എക്സും രാജ്യത്തെ പ്രഗത്ഭരായ സാങ്കേതിക വിദഗ്ദ്ധരെയും ഉൾപ്പെടുത്തി അന്താരാഷ്ട്ര നിലവാരത്തിലാണ് സിനിമ ഒരുക്കുന്നത്.