ഓപ്പറേഷൻ നുംഖോർ; നടൻ അമിത് ചക്കാലയ്ക്കലിന്റെ ലാൻഡ് ക്രൂയിസർ വിട്ടുകൊടുത്തു

കൊച്ചി: ഓപ്പറേഷൻ നുംഖോറിന്റെ ഭാഗമായി കൊച്ചി കസ്റ്റംസ് പിടിച്ചെടുത്ത നടൻ അമിത് ചക്കാലയ്ക്കലിന്റെ ഒരു വാഹനം വിട്ടുനൽകി. മദ്ധ്യപ്രദേശ് രജിസ്ട്രേഷനിലുള്ള ലാൻഡ്ക്രൂയിസർ എസ് യു വിയാണ് വിട്ടുകൊടുത്തത്. അമിതിന്റെ അപേക്ഷ പരിഗണിച്ചാണ് കസ്റ്റംസ് അഡീഷണൽ കമ്മീഷണറുടെ തീരുമാനം.

ബോണ്ടിന്റെയും 20 ശതമാനം ബാങ്ക് ഗ്യാരണ്ടിയുടെയും അടിസ്ഥാനത്തിലാണ് വാഹനം തിരികെനൽകിയത്. ഏത് സമയം ആവശ്യപ്പെട്ടാലും വാഹനം ഹാജരാക്കണം,​ വാഹനം ഉപയോഗിക്കരുത് തുടങ്ങിയ വ്യവസ്ഥകളോടെയാണ് വിട്ടുനൽകിയത്. നികുതി വെട്ടിച്ച് ഭൂട്ടാനിൽ നിന്ന് കേരളത്തിലേക്ക് വാഹനങ്ങൾ കടത്തുന്ന സംഭവത്തിൽ കസ്റ്റംസ് നടത്തിയ റെയ്ഡിന്റെ ഭാഗമായാണ് അമിതിന്റെ വാഹനം പിടിച്ചെടുത്തത്. പിടിച്ചെടുത്ത വാഹനങ്ങൾ താൽക്കാലികമായി വിട്ടുകിട്ടുന്നതിന് അപേക്ഷ നൽകാൻ അവസരമുണ്ടെന്ന് നടൻ ദുൽഖർ സൽമാന്റെ കേസിൽ കസ്റ്റംസ് വ്യക്തമാക്കിയിരുന്നു. ദുൽഖറിന് വാഹനം വിട്ടുകിട്ടിയതിന് പിന്നാലെയാണ് അമിതും സമാന അപേക്ഷ സമർപ്പിച്ചത്.

സെപ്തംബറിലാണ് ഓപ്പറേഷൻ 'നുംഖോർ' എന്ന പേരിൽ പരിശോധന നടത്തി വാഹനം പിടിച്ചെടുത്തത്. ഭൂട്ടാൻ പട്ടാളം ഉപേക്ഷിച്ചതും വിന്റേജ് വിഭാഗത്തിൽപ്പെട്ടതുമായ വാഹനങ്ങൾ കടത്തിക്കൊണ്ടുവന്ന് വിൽക്കുന്ന സംഘത്തെ പൂട്ടുകയായിരുന്നു ലക്ഷ്യം.നടന്മാരായ പൃഥ്വിരാജ്, ദുൽഖർ സൽമാൻ എന്നിവരുടെ വസതികളിലും പരിശോധന നടത്തിയിരുന്നു.

കോയമ്പത്തൂരിലെ വാഹനക്കടത്ത് സംഘം മുഖേന എത്തിച്ച 150 മുതൽ 200വരെ വാഹനങ്ങൾ അനധികൃതമായി ഹിമാചൽ പ്രദേശിൽ രജിസ്റ്റർ ചെയ്ത് കേരളത്തിൽ എത്തിച്ചെന്നായിരുന്നു കസ്റ്റംസിന് ലഭിച്ച വിവരം. ഇടനിലക്കാർ മുഖേന താരങ്ങളടക്കം വാഹനങ്ങൾ വാങ്ങിയെന്ന് ഉറപ്പാക്കിയ ശേഷമായിരുന്നു പരിശോധന.