പ്രതിവർഷം കയറ്റുമതി ചെയ്യുന്നത് 255 ദശലക്ഷം ടൺ; ഇന്ത്യൻ ചായയുടെ രുചി ഇനി ലോകമറിയും

ന്യൂഡൽഹി: ദക്ഷിണേന്ത്യയിലെ പ്രധാന പാനീയമായ ചായയ്‌ക്ക് നയപരമായ പിന്തുണ നൽകി കേന്ദ്രസർക്കാർ. അന്താരാഷ്‌ട്ര വിപണിയോട് മത്സരിക്കാനാകും വിധത്തിൽ നവീനമായ രീതിയിൽ ഗുണനിലവാരമുള്ള ചായ ഇനങ്ങൾ വികസിപ്പിക്കേണ്ടത് അത്യാവശ്യമാണെന്നു കേന്ദ്ര വാണിജ്യ മന്ത്രി പീയുഷ് ഗോയൽ പറഞ്ഞു. അതിനായി സാങ്കേതിക വിദ്യയുടെ മികച്ച ഉപയോഗം ആവശ്യമാണെന്നും അദ്ദേഹം അഭിപ്രായപ്പെട്ടു. ന്യൂഡൽഹിയിൽ നടന്ന സുരക്ഷിത തേയില ഉത്പാദന സമ്മേളനത്തിൽ സംസാരിക്കുകയായിരുന്നു അദ്ദേഹം.

അന്താരാഷ്ട്രതലത്തിൽ വിപണനം ചെയ്യാവുന്ന കൂടുതൽ ഉൽപ്പന്നങ്ങൾ നിർമ്മിക്കുന്നതിന് ഉൽപ്പാദനത്തിൽ മുന്നിലുള്ള ഡാർജിലിംഗ്, അസം, നീലഗിരി എന്നിവയ്ക്ക് അപ്പുറത്തേക്ക് നീങ്ങണമെന്ന് അദ്ദേഹം പറഞ്ഞു. തേയിലയുടെ ഉൽപാദനത്തിലും കയറ്റുമതിയിലും ഇന്ത്യ ലോകത്തിൽ ഒന്നാം സ്ഥാനത്തായതിനാൽ ഗുണനിലവാരവും സുരക്ഷയും നിലനിർത്തുന്നത് നിർണായകമാണ്. സുസ്ഥിര കൃഷി, ഉത്തരവാദിത്തമുള്ള തൊഴിൽ രീതികൾ, കുറഞ്ഞ അളവിലുളള കീടനാശിനി പ്രയോഗം എന്നിവയ്‌ക്ക് അന്താരാഷ്‌ട്ര വിപണിയിൽ ആവശ്യക്കാർ കൂടുതലാണെന്ന് അദ്ദേഹം പറഞ്ഞു.

'ഓരോ കപ്പ് ഇന്ത്യൻ ചായയും ഗുണനിലവാരം, പൈതൃകം, വിശ്വാസം എന്നിവയെ പ്രതിനിധീകരിക്കുന്നുണ്ടെന്ന് ഉറപ്പാക്കാൻ സർക്കാരും വ്യവസായിക രംഗവും ഒന്നായി പ്രവർത്തിക്കണം' പിയുഷ് ഗോയൽ പറഞ്ഞു. മേഖലയുടെ ഭാവിയെ വികസിത് ഭാരത് 2047 ന്റെ വിശാലമായ കാഴ്ചപ്പാടുമായി ബന്ധിപ്പിക്കുമെന്നും അദ്ദേഹം കൂട്ടിച്ചേർത്തു.

പ്ലക്കിംഗ് മുതൽ പ്രൊസസിംഗ്, പാക്കേജിംഗ്, കയറ്റുമതി തുടങ്ങി ഓരോ ഘട്ടവും നിരീക്ഷിക്കാൻ സഹായിക്കുന്ന ബ്ലോക്ക് ചെയിൻ പോലുള്ള സംവിധാനങ്ങൾ ഉപയോഗിക്കണമെന്ന് മന്ത്രി നിർദേശിച്ചു. തേയില കർഷകർക്കും തൊഴിലാളികൾക്കും 1,000 കോടി രൂപയുടെ പിന്തുണാ പാക്കേജും ചെറുകിട കർഷകർക്ക് പച്ച ഇലയ്ക്ക് മികച്ച വില നേടാൻ സഹായിക്കുന്ന ചായ് സഹയോഗ് ആപ്പ് പോലുള്ള ഡിജിറ്റൽ ഉപകരണങ്ങളെക്കുറിച്ചും ഗോയൽ എടുത്തുപറഞ്ഞു. ലോകത്തിലെ ഏറ്റവും വലിയ തേയില ഉൽപ്പാദകരിലും കയറ്റുമതിക്കാരിലും ഒന്നാണ് ഇന്ത്യ, പ്രതിവർഷം ഏകദേശം 255 ദശലക്ഷം ടൺ കയറ്റുമതി ചെയ്യുനണ്ടെന്ന് അദ്ദേഹം ഓർമ്മിപ്പിച്ചു.