"ക്ഷേമപെൻഷൻ വാങ്ങി ശാപ്പാടടിച്ചിട്ട് നമുക്കിട്ട് വച്ചു": എം.എം. മണി

നെടുങ്കണ്ടം: നല്ല ഒന്നാന്തരം പെൻഷൻ മേടിച്ചിട്ട് ഭംഗിയായി ശാപ്പാടും കഴിച്ച ശേഷം നല്ല ഭംഗിയായി നമുക്കിട്ട് വച്ചുവെന്ന് എം.എം. മണി എം.എൽ.എ. തദ്ദേശ സ്വയംഭരണ തിരഞ്ഞെടുപ്പ് ഫലപ്രഖ്യാപനത്തിന് ശേഷം മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. വികസന പരിപാടികൾക്കും ജനക്ഷേമ പ്രവർത്തനങ്ങൾക്കും വോട്ട് കിട്ടുമെങ്കിൽ എൽ.ഡി.എഫ് ഒരു കാരണവശാലും പരാജയപ്പെടേണ്ടതല്ല. ക്ഷേമ പ്രവർത്തനങ്ങൾ,പെൻഷൻ,റോഡ് തുടങ്ങിയ വികസന പ്രവർത്തനങ്ങളെല്ലാം നൽകിയിട്ടും ജനങ്ങൾ എൽ.ഡി.എഫിനോട് നന്ദി കാണിച്ചില്ല. ശബരിമല വിഷയം തിരഞ്ഞെടുപ്പിനെ ബാധിച്ചിട്ടില്ല. രാഹുൽ മാങ്കൂട്ടത്തിനെപ്പോലെയുള്ളവരെയാണ് ജനങ്ങൾക്ക് വേണ്ടതെന്നും തോൽവിയുടെ കാരണം പാർട്ടി അന്വേഷിക്കുമെന്നും മണി പറഞ്ഞു. മണിയുടെ സ്വന്തം നാടായ രാജാക്കാട് പഞ്ചായത്തിൽ 13 വാർഡിൽ 10 വാർഡും യു.ഡി.എഫ് പിടിച്ചെടുത്തു. ഉടുമ്പൻചോല നിയോജകമണ്ഡലത്തിലെ 10 പഞ്ചായത്തുകളിൽ ആറിലും യു.ഡി.എഫ് ഭരണമാണ് വരുന്നത്.