ഒറ്റ ചാർജിൽ ഇനി തിരുവനന്തപുരം മുതൽ കണ്ണൂർ വരെ എത്താം,​ ഇലക്ട്രിക് വിപണി പിടിക്കാനൊരുങ്ങി ടൊയോട്ട

​​​​​ഇന്ത്യൻ ഇലക്ട്രിക് വാഹന വിപണിയിൽ വൻ മുന്നേറ്റത്തിനൊരുങ്ങി ടൊയോട്ട. ആദ്യ ഇലക്ട്രിക് എസ്യുവിയായ 'അർബൻ ക്രൂയിസർ ഇബെല്ലയാണ് ടൊയോട്ട പുറത്തിറക്കുന്നത്. ഒറ്റചാർജിൽ 543 കിലോമീറ്റർ വരെ സഞ്ചരിക്കാൻ കഴിയുമെന്നാണ് റിപ്പോർട്ടുകൾ. മാരുതി സുസുക്കിയുടെ ഉടൻ പുറത്തിറങ്ങാനിരിക്കുന്ന ഇ-വിറ്റാരയുടെ പ്ലാറ്റ്‌ഫോമിൽ നിർമ്മിച്ച വാഹനം, ഫീച്ചറുകളിലും സുരക്ഷയിലും ടൊയോട്ടയുടെ തനതായ മുദ്ര പതിപ്പിച്ചാണ് വിപണിയിലെത്തുന്നത്.

ഇ-വിറ്റാരയുമായി സാമ്യമുണ്ടെങ്കിലും മുൻഭാഗത്ത് ടൊയോട്ട കാര്യമായ മാറ്റങ്ങൾ വരുത്തിയിട്ടുണ്ട്. കറുപ്പ്, തവിട്ട് നിറങ്ങൾ ഉൾപ്പെട്ട ഡ്യുവൽ ടോൺ ഇന്റീരിയറാണ് വാഹനത്തിൽ. ഇ-വിറ്റാരയുടേത് പോലെയാണ് ഡാഷ്‌ബോർഡ് ലേഔട്ട്. 18 ഇഞ്ച് അലോയ് വീലുകളും ബന്ധിപ്പിച്ച എൽഇഡി ടെയിൽ ലാമ്പുകളും വാഹനത്തിന്റെ പ്രീമിയം ലുക്ക് വർദ്ധിപ്പിക്കുന്നു.

49kWh,​ 61kWh എന്നീ രണ്ട് ബാറ്ററി ഓപ്ഷനുകളിലാണ് വാഹനം എത്തുന്നത്. വലിയ ബാറ്ററി പാക്കുള്ള വേരിയന്റ് 171.6 എച്ച്പി ഇലക്ട്രിക് മോട്ടോറാണ് ഉപയോഗിക്കുന്നത്. അത് 189 എൻഎം ടോർക്ക് നൽകും. ചെറിയ 49 kWh വേരിയന്റിൽ 106 എച്ച്പി ഇലക്ട്രിക് മോട്ടോറാണ് സ്ഥാപിച്ചിരിക്കുന്നത്.

​​​​​ഫാസ്റ്റ് ചാർജിംഗിലൂടെ വെറും 45 മിനിട്ടിൽ പത്ത് മുതൽ 80 ശതമാനം വരെ ചാർജ് ചെയ്യാം. 10.25 ഇഞ്ച് ടച്ച് സ്ക്രീൻ, വയർലെസ് കണക്ടിവിറ്റി, വെന്റിലേറ്റഡ് സീറ്റുകൾ, ജെബിഎൽ ഓഡിയോ സംവിധാനങ്ങളടക്കം വാഹനത്തിൽ ഉൾപ്പെടുത്തിയിട്ടുണ്ട്. ഏഴ് എയർബാഗുകൾ സ്റ്റാൻഡേർഡായി ലഭിക്കും. ലെവൽ-2 ADAS സാങ്കേതികവിദ്യ, 360 ഡിഗ്രി ക്യാമറ, ബ്ലൈൻഡ് സ്‌പോട്ട് മോണിറ്ററിംഗ് എന്നിവയാണ് മറ്റ് പ്രധാന സുരക്ഷാ ക്രമീകരണങ്ങൾ.