നൊവാക്ക്, സിന്നർ, കീസ്,ഇഗ മുന്നോട്ട്

മെൽബൺ : ഓസ്ട്രേലിയൻ ഓപ്പൺ ടെന്നിസിൽ നിലവിലെ ചാമ്പ്യന്മാരായ മാർട്ടിൻ കീസും യാന്നിക്ക് സിന്നറും മുൻ ചാമ്പ്യൻ നൊവാക്ക് ജോക്കോവിച്ചും മൂന്നാം റൗണ്ടിലേക്ക് പ്രവേശിച്ചു. മുൻ ലോക ഒന്നാംനമ്പർ ഇഗ ഷ്വാംടെക്കും ഇന്നലെ രണ്ടാം റൗണ്ടിൽ വിജയം നേ‌ടി.

അമേരിക്കൻ താരം അഷ്‌ലിൻ ക്രൂഗറെ 6-1,7-5 എന്ന സ്കോറിനാണ് മാർട്ടിൻ കീസ് രണ്ടാം റൗണ്ടിൽ കീഴടക്കിയത്. ഇഗ ചെക്ക് റിപ്പബ്ളിക്കിന്റെ മാരീ ബൗസ്കോവയെ 6-2,6-3ന് മറികടന്നു.നാലാം സീഡ് അമേരിക്കൻ താരം അനിസിമോവ 6-1,6-4ന് കാതറിന സിനിയാക്കോവയെ തകർത്ത് മൂന്നാം റൗണ്ടിലെത്തി.മുൻ ചാമ്പ്യൻ നവോമി ഒസാക്ക മൂന്ന് സെറ്റ് നീണ്ട പോരാട്ടത്തിൽ റൊമാനിയൻ താരം സൊറാന ക്രിസ്റ്റീയയെ 6-3,4-6,6-2ന് കീഴടക്കി മുന്നേറി.

പുരുഷ സിംഗിൾസിൽ നാലാം സീഡായി കളത്തിലിറങ്ങിയ നൊവാക്ക് ജോക്കോവിച്ച് ഇറ്റാലിയൻ ക്വാളിഫയർ മാസ്ട്രേലിയെയാണ് രണ്ടാം റൗണ്ടിൽ തോൽപ്പിച്ചത്. സ്കോർ : 6-3,6-2,6-2.യാന്നിക്ക് സിന്നർ 6-1,6-4,6-2 എന്ന സ്കോറിന് വൈൽഡ് കാർഡ് എൻട്രി ഡക്ക്‌വർത്തിനെ തോൽപ്പിച്ച് മൂന്നാം റൗണ്ടിലെത്തി.

പുരുഷ ഡബിൾസിൽ ഇന്ത്യയുടെ ശ്രീറാം ബാലാജി - ഓസ്ട്രേലിയയുടെ ഒബെർലെയ്ന്റർ സഖ്യം ആദ്യ റൗണ്ടിൽ വിജയം നേടിയപ്പോൾ മിക്സഡ് ഡബിൾസിൽ ഇന്ത്യയുടെ യുകി ബാംബ്രി - അമേരക്കിക്കയുടെ മെലിചർ മാർട്ടിനെസ് സഖ്യം ആദ്യറൗണ്ടിൽ പുറത്തായി.