(പുസ്തകം)​ വിജയൻ മാഷും കാരശ്ശേരിയും

എം.എൻ. വിജയൻ

സംഭാഷണങ്ങൾ

മലയാളി ആവേശപൂർവം സ്വീകരിച്ച എഴുത്തുകാരനും പ്രഭാഷകനുമായ എം.എൻ. വിജയൻ മാഷുമായി പല കാലത്ത് ഡോ. അസീസ് തരുവണ നടത്തിയ സംഭാഷണങ്ങളുടെ സമാഹാരം. വരാനിരിക്കുന്ന ഇരുളിമയാർന്ന കാലത്തെക്കുറിച്ചുള്ള പ്രവചന സ്വഭാവമുള്ള നിരീക്ഷണങ്ങൾ ഈ സംഭാഷണങ്ങളിൽ ഉടനീളം കാണാനാവും. ആഗോളീകരണത്തിന്റെ അപകടങ്ങളെക്കുറിച്ചും ഫാഷിസത്തിന്റെ പുതുരൂപങ്ങളെക്കുറിച്ചും വളരെ നേരത്തേ സംസാരിച്ചുതുടങ്ങിയ ആളാണ് വിജയൻ മാഷ്. രാഷ്ട്രീയം,​ ഫാഷിസം,​ വർഗീയത,​ മന:ശാസ്ത്രം,​ സംസ്കാരം തുടങ്ങി,​ വായനയെ ഗൗരവത്തോടെ സമീപിക്കുന്നവരിൽ കൗതുകവും ആകാംക്ഷയും ജനിപ്പിക്കുന്നതാണ് ഈ സംഭാഷണങ്ങൾ.

പ്രസാധകർ:

ഒലിവ്,​ കോഴിക്കോട്

തുഞ്ചൻ പറമ്പിലെ

ബ്ളീച്ച്

എം.എൻ. കാരശ്ശേരിയുടെ ഗൗരവമാർന്ന ലേഖനങ്ങൾ വായിച്ചവർക്കും,​ പ്രസംഗങ്ങൾ കേട്ടവർക്കും 'തുഞ്ചൻ പറമ്പിലെ ബ്ളീച്ച്" എന്ന കൃതി വലിയ കൗതുകമായിരിക്കും. കാരണം,​ ഇത് കാരശ്ശേരി തന്നിലേക്കും തനിക്കു ചുറ്രിലേക്കും നോക്കി നടത്തുന്ന ചിരിയുടെ എഴുത്താണ്. 21 തമാശ ലേഖനങ്ങളുടെ സമാഹാരമാണ് ഇതെന്ന് ആമുഖമായി പറയുന്ന കാരശ്ശേരി,​ ഈ സ്വഭാവത്തിലുള്ള തന്റെ ആദ്യത്തെ പുസ്തകമാണ് ഇതെന്നും പറയുന്നു. വായനക്കാരോട് ഗ്രന്ഥകാരന്റെ ഒരു അഭ്യർത്ഥനയുമുണ്ട്: 'ഈ സമാഹാരം (സംഹാരം?​)​ വായിച്ചുകഴിഞ്ഞിട്ട് അല്പംപോലും ചിരി വരാത്തവർ ഇക്കിളിപ്പെടുത്താൻ ആരെയെങ്കിലും ഏർപ്പാടാക്കി ഒന്നു ചിരിക്കണേ. അതിനു വരുന്ന ചെലവ് ‍ഞാൻ ഏറ്റു!" തോമസ് ജേക്കബിന്റെ മനോഹരമായ അവതാരികയും.

പ്രസാധകർ:

ഒലിവ്,​ കോഴിക്കോട്

ഞാനും മറ്റും

തുടർച്ചയൊന്നും പറയാനില്ലാത്ത,​ ഓർമ്മക്കുറിപ്പുകൾ എന്നു വിളിക്കാവുന്ന നൂറ്റിരണ്ട് കുഞ്ഞുകുഞ്ഞ് ആത്മകഥനങ്ങളുടെ സമാഹാരമാണ് ശൈലൻ എഴുതിയ 'ഞാനും മറ്റും." ഇതിലെല്ലാം ഞാനുണ്ട്,​ ഇതെല്ലാം ഞാനാണ്" എന്ന് ആമുഖമായി ശൈലൻ പറയുന്നുണ്ടെങ്കിലും ഇതിലുള്ളത് അതെഴുതിയ ആൾ മാത്രമല്ലെന്നും,​ വായനക്കാരന് ഇതിൽ നിന്ന് അയാളെത്തന്നെ സ്വയം കണ്ടെടുക്കാനാവുന്നുണ്ടെന്നും ഓരോ വായനയിലും മനസിലാകും. ചിത്രങ്ങളും പേജുകളുടെ രൂപകല്പനയിലെ വൈവിദ്ധ്യവും ഈ പുസ്തകത്തെ വ്യത്യസ്തവും മനോഹരവുമാക്കുന്നുണ്ട്. കുറിപ്പുകൾ ഓരോന്നും തീരെ ചെറുതാകയാൽ,​ യാത്രയിലും മറ്റും വായിക്കാൻ എളുപ്പം.

പ്രസാധകർ:

ഒലിവ്,​ കോഴിക്കോട്

ബൊമ്മ കല്യാണം

ജീവിതത്തിന്റെ പിന്നാമ്പുറങ്ങളിൽ തോറ്റുതീരുന്ന കുറേ മനുഷ്യരുടെ ദൈന്യങ്ങളിലൂടെയുള്ള യാത്രയാണ് ബൊമ്മ കല്യാണം എന്ന കഥാ സമാഹാരം. ഈ കൊച്ചു കഥാപുസ്തകത്തിൽ ആരും സാഹിത്യം തിരഞ്ഞുപോകരുതെന്ന് ആമുഖത്തിൽ എഴുതുന്ന കഥാകാരൻ,​ കണ്ടതും അനുഭവിച്ചതുമായ ജീവിതം തന്റേതായ ഭാഷയിൽ എഴുതിവയ്ക്കുക മാത്രമാണ് ചെയ്തിട്ടുള്ളതെന്നും പറയുന്നു. ഈ സത്യസന്ധതയുടെ സൗന്ദര്യവും ലാളിത്യത്തിന്റെ ചാരുതയും തന്നെയാണ് 'ബൊമ്മ കല്യാണ"ത്തിലെ ഓരോ കഥയെയും അനുഭവമാക്കിത്തീർക്കുന്നത്. സീതിക്കായുടെ പൗരത്വം,​ ചോന്നോൻ,​ തെളിയാത്ത ജന്മങ്ങൾ,​ ബൊമ്മ കല്യാണം തുടങ്ങി പത്തു കഥകളുടെ സമാഹാരം.

പ്രസാധകർ:

ബുക്‌മാൻ,​ കോഴിക്കോട്

അവൾ അല്ല അവൾ

സങ്കീർണമായ മനുഷ്യജീവിതവും നിഗൂഢമായ ലോകക്രമവും തമ്മിലുള്ള തീക്ഷ്ണമായ ഏറ്റുമുട്ടലുകളുടെ,​ യാഥാർത്ഥ്യവും ഭാവനയും കെട്ടുപിണയുന്ന സർറിയലിസ്റ്റ് കഥകളുടെ സമാഹാരമാണ് ഡോ. ആർ. സത്യജിത്തിന്റെ 'അവൾ അല്ല അവൾ." ഹ്യൂമനോയിഡിസത്തിന്റെ ഈ കാലഘട്ടത്തിൽ മനുഷ്യത്വത്തിന്റെ പരിണാമങ്ങളെയും ആന്യവത്കരണങ്ങളെയും കഥാകാരൻ ഇതിലെ കഥകളിലൂടെ വിസ്മയകരമായി ആവിഷ്കരിക്കുന്നു. പത്തു കഥകളുടെ പുസ്തകത്തിൽ,​ ഡോ. ആർ. സത്യജിത്തിന്റെ കഥകളെക്കുറിച്ച് 'ചിതറിയ കാലത്തെ കോർത്തെടുക്കുമ്പോൾ" എന്ന,​ ആർ. ചന്ദ്രബോസ് എഴുതിയ പഠനവും.

പ്രസാധകർ:

സദ്ഭാവന ട്രസ്റ്റ്

തിരുവനന്തപുരം

ആ നാലു വർഷങ്ങൾ- 3.0

കോതമംഗലം മാർ അത്തനേഷ്യസ് കോളേജ് ഒഫ് എൻജിനിയറിംഗിൽ പഠിച്ച്,​ യു.എ.ഇയിലെ വിവിധ ഭാഗങ്ങളിൽ ജോലി ചെയ്യുന്ന പൂർവവിദ്യാർത്ഥികൾ പഴയ കാലത്തിന്റെ ഓർമ്മകൾ പങ്കുവയ്ക്കുന്ന പുസ്തകമാണ് താഹിർ റഹിം,​ അനൂപ് പി.പി എന്നിവർ എ‌ഡിറ്റർമാരായ 'ആ നാലു വർഷങ്ങൾ- 3.0" എന്ന പുസ്തകം. തിരക്കേറിയ പ്രവാസ ജീവിതത്തിനിടയിലും മായാത്ത കലാലയ സൗഹൃദങ്ങൾ നിലനിറുത്താൻ 'മെയ്സ് ആലുംനി" നടത്തുന്ന അവിശ്വസനീയ ശ്രമങ്ങളുടെ നേർക്കാഴ്ചയാണ് ഇത്. 'മെയ്സി"ന്റെ പശ്ചാത്തലത്തിലാണ് ഇതിലെ ഓർമ്മകളെങ്കിലും,​ വായനക്കാരെ അവരുടെ സ്വന്തം കലാലയ കാലത്തേക്ക് കൈപിടിച്ചു നടത്തും,​ ഇതിലെ ഓരോ അദ്ധ്യായവും.

പ്രസാധകർ:

ഹരിതം ബുക്സ്

കോഴിക്കോട്