കഞ്ചാവുമായി പറവൂർ സ്വദേശി പിടിയിൽ

പറവൂർ: സ്കൂൾ, കോളേജ് വിദ്യാർത്ഥികൾക്കിടയിൽ വില്പനയ്ക്കായി കൊണ്ടുവന്ന പന്ത്രണ്ടര കിലോ കഞ്ചാവുമായി പെരുവാരം പൂതയിൽ വിനോദിനെ (46) വടക്കേക്കര പൊലീസും റൂറൽ ജില്ലാ ഡാൻസാഫ് ടീമും ചേർന്ന് പിടികൂടി. ഒഡീഷയിൽ നിന്ന് കഞ്ചാവ് വാങ്ങി ട്രെയിനിൽ യാത്ര ചെയ്ത് പാലക്കാട് ഇറങ്ങി അവിടെ നിന്ന് ബസിലാണ് ഇയാൾ എത്തിയത്. ഷോൾഡർ ബാഗുകളിൽ പ്രത്യേക പായ്ക്കറ്റുകളിലായാണ് കഞ്ചാവ് സൂക്ഷിച്ചിരുന്നത്.

വിനോദിനെതിരെ കഞ്ചാവ് കൈവശം വച്ചതിന് കോതമംഗലം എക്സൈസിൽ മയക്കുമരുന്ന് കേസും പറവൂർ പൊലീസിൽ അടിപിടി കേസുമുണ്ട്. കൂടുതൽ അന്വേഷണത്തിനായി പ്രതിയെ കസ്റ്റഡിയിൽ വാങ്ങുമെന്ന് പൊലീസ് അറിയിച്ചു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.