ഭരണത്തുടർച്ച ഉറപ്പെന്ന് സി.പി.എം പൊളിറ്റ് ബ്യൂറോ

ന്യൂഡൽഹി: കേരളത്തിൽ മൂന്നാംവട്ടവും എൽ.ഡി.എഫ് സർക്കാ‌ർ അധികാരത്തിൽ വരുമെന്ന് വിലയിരുത്തി സി.പി.എം പൊളിറ്റ് ബ്യുറൊ. 75 സീറ്രിലധികം നേടുമെന്നാണ് സംസ്ഥാന ഘടകം പി.ബിയെ അറിയിച്ചിരിക്കുന്നത്. ഭരണവിരുദ്ധ വികാരമോ,​ സർക്കാരിനെതിരെ ന്യൂനപക്ഷ ഏകീകരണമോ ഉണ്ടായിട്ടില്ലെന്നാണ് പാർട്ടിയുടെ വിലയിരുത്തൽ.

ഭരണതുടർച്ച ഉറപ്പെന്ന് സി.പി.എം ജനറൽ സെക്രട്ടറി എം.എ. ബേബി ഇന്നലെ ഡൽഹിയിൽ പ്രതികരിച്ചു. ഓൺലൈൻ മുഖേന നടന്ന യോഗത്തിൽ മുഖ്യമന്ത്രി പിണറായി വിജയനും,​ സംസ്ഥാന സെക്രട്ടറി എം.വി. ഗോവിന്ദനും അടക്കം നേതാക്കൾ പങ്കെടുത്തു.

പിന്നിൽ ദുരുദ്ദ്യേശം

വനിതാ സംവരണ ബില്ലും,​ മണ്ഡല പുനർനിർണയ നീക്കവും സി.പി.എം പി.ബി ചർച്ച ചെയ്‌തു. ബില്ലിന്റെ മറവിൽ നിരവധി ദുരുദ്ദ്യേശങ്ങൾ ഒളിച്ചു വച്ചിട്ടുണ്ടെന്ന് എം.എ. ബേബി പറഞ്ഞു. വിമർശിക്കുന്നവർ വനിതാ സംവരണത്തിന് എതിരാണെന്ന് വരുത്തി തീർക്കാനാണ് ശ്രമം. ഈ തട്ടിപ്പിനെ അതിശക്തമായി സി.പി.എമ്മും ഇടതു പാർട്ടികളും എതിർക്കും. വനിതാ സംവരണത്തിന് വേണ്ടി മരിക്കാൻ പോലും സി.പി.എം തയ്യാറാണ്. എന്നാലിവിടെ സംവരണത്തിന്റെ പേരിൽ ക്രിമിനൽ ഗൂഢാലോചനയാണ് നടക്കുന്നത്. പാർലമെന്റിനെ ആർ.എസ്.എസ് അക്രമികളുടെ ആൾക്കൂട്ടമാക്കാനാണ് ശ്രമമെന്നും ബേബി കൂട്ടിച്ചേർത്തു.