പെൺകുട്ടികളുടെ വിദ്യാഭ്യാസത്തിനായി 95.7 ലക്ഷം രൂപ നൽകി ഹാരിയും മേഗനും

വാഷിംഗ്ടൺ: സാമ്പത്തികമായി പിന്നാക്കം നിൽക്കുന്ന പെൺകുട്ടികളുടെ വിദ്യാഭ്യാസത്തിനായുള്ള 'കാമ്പയിൻ ഫോർ ഫീമെയിൽ എജ്യുക്കേഷനിൽ" 1,30,000 യു.എസ് ഡോളർ (95.7 ലക്ഷം രൂപ) സംഭാവന നൽകി ഹാരി രാജകുമാരനും ഭാര്യ മേഗൻ മെർക്കലും. ഹാരി രാജകുമാരന്റെ 36-ാം പിറന്നാളിനോടനുബന്ധിച്ചാണ് ഇരുവരും ധനസഹായം നൽകാൻ തീരുമാനിച്ചത്. സെപ്തംബർ 15 നായിരുന്നു രാജകുമാരന്റെ ജന്മദിനം.

സിംബാബ്​വെ, സാംബിയ, ടാൻസാനിയ, മലാവി എന്നീ രാജ്യങ്ങളിലെ പെൺകുട്ടികൾക്കാണ് ഇതിന്റെ പ്രയോജനം ലഭിക്കുക.

ഇവരുടെ ആരാധകരുടെ സംഘടനയായ സസക്‌സ് സ്‌ക്വാഡും ഇതിലേയ്ക്ക് തുക സംഭാവന ചെയ്തിട്ടുണ്ട്. 'ജന്മദിനം ആഘോഷിക്കാൻ ഇതിലും നല്ലൊരു വഴിയില്ല, സംഭാവനകൾ തന്ന എല്ലാവർക്കും നന്ദി' - മേഗൻ പറഞ്ഞു.

'ഹാരിയുടെയും മേഗന്റെയും ആരാധകരാകുക എന്നാൽ ആഘോഷങ്ങളെല്ലാം അർത്ഥവത്താക്കുക എന്നുകൂടിയാണ്. വലിയൊരു പ്രചോദനമാണത്. ഞങ്ങൾ അവർക്കൊപ്പം സമൂഹത്തിനായുള്ള പ്രവർത്തനങ്ങളിൽ എപ്പോഴും മുന്നിൽ നിൽക്കും. ' - കാംഫെഡ് അവരുടെ ഓഫീഷ്യൽ വെബ്‌സൈറ്റിൽ കുറിച്ചു