വെള്ള കാർഡുകാർക്ക് റേഷൻ വെട്ടിക്കുറച്ചു

തിരുവനന്തപുരം: മേയ് മാസത്തിൽ വെള്ള കാർഡ് ഉടമകൾക്കുള്ള സാധാരണ റേഷൻ വിഹിതം ഭക്ഷ്യപൊതുവിതരണ വകുപ്പ് കുറച്ചു. കഴിഞ്ഞ മാസം കിലോയ്‌ക്ക് 10.90 രൂപയ്‌ക്ക് 4 കിലോ അരി നൽകിയ സ്ഥാനത്ത് ഇത്തവണ 2 കിലോ മാത്രമാണ് നൽകുക. നീല കാർഡിലെ ഓരോ അംഗത്തിനും 2 കിലോ അരി വീതം കിലോയ്‌ക്ക് 4 രൂപ നിരക്കിൽ ഈ മാസവും നൽകും. വെള്ള,നീല കാർഡ് ഉടമകൾക്ക് ഈ മാസവും 10 കിലോ സ്പെഷ്യൽ അരി 15 രൂപയ്‌ക്ക് നൽകും.

ആവശ്യത്തിന് സ്‌പെഷ്യൽ അരി സ്റ്റോക്കില്ലെന്ന പ്രശ്നവുമുണ്ട്. മണ്ണെണ്ണ വിതരണം ഈ മാസവുമില്ല. കേന്ദ്ര വിഹിതം കുറഞ്ഞതിനാൽ ഏറെക്കാലമായി മൂന്നു മാസത്തിലൊരിക്കലാണ് മണ്ണെണ്ണ വിതരണം. പ്രധാനമന്ത്രി ഗരീബ് കല്യാൺ യോജന പദ്ധതിപ്രകാരം മഞ്ഞ, പിങ്ക് കാർഡ് ഉടമകൾക്കുള്ള സൗജന്യ അരിവിതരണത്തെ സംബന്ധിച്ച് ഭക്ഷ്യവകുപ്പ് പിന്നീട് അറിയിക്കും.