തിരുവനന്തപുരം: കന്യാകുമാരി മുതൽ തിരുവനന്തപുരം വരെയുള്ള റെയിൽവേ ലൈനിൽ ജോലി നടക്കുന്നതിനാൽ ഇന്നുമുതൽ(26-01-2023)ഫെബ്രുവരി 15വരെ ട്രെയിൻ ഗതാഗത നിയന്ത്രണം ഏർപ്പെടുത്തി.

കൊല്ലം - കന്യാകുമാരി, കന്യാകുമാരി - കൊല്ലം മെമു എന്നിവ 26നും ഫെബ്രുവരി 4 മുതൽ 9വരെയും 14,15 തീയതികളിലും റദ്ദാക്കി. പുനലൂർ - നാഗർകോവിൽ എക്സ്‌പ്രസ് , കന്യാകുമാരി -പുനലൂർ എക്സ്‌പ്രസ്, തിരുവനന്തപുരം - നാഗർകോവിൽ എക്സ്‌പ്രസ് എന്നിവ ഫെബ്രുവരി 14മുതൽ 17വരെ റദ്ദാക്കി.

26,27 ദിവസങ്ങളിലും ഫെബ്രുവരി 4മുതൽ 17വരെയും തിരുവനന്തപുരം - തിരുച്ചിറപ്പള്ളി സൂപ്പർഫാസ്റ്റ് തിരുനെൽവേലിയിൽ നിന്നായിരിക്കും പുറപ്പെടുക. തിരുച്ചിറപ്പളളിൽ നിന്ന് തിരുവനന്തപുരത്തേക്കുള്ള സർവ്വീസും ഈ ദിവസങ്ങളിൽ തിരുനെൽവേലി വരെ മാത്രമായിരിക്കും. ഈ ദിവസങ്ങളിൽ കോട്ടയം - നാഗർകോവിൽ എക്സ്പ്രസ് തിരുവനന്തപുരത്ത് യാത്ര അവസാനിപ്പിക്കും. മടക്കയാത്രയും തിരുവനന്തപുരത്തുനിന്ന് തന്നെയായിരിക്കും. മംഗലാപുരം - നാഗർകോവിൽ എക്സ്പ്രസ് 27,29 തീയതികളിലും ഫെബ്രുവരി 10മുതൽ 13 വരെയും തിരുവനന്തപുരത്ത് യാത്ര അവസാനിപ്പിക്കുകയും അവിടെ നിന്ന് യാത്ര തുടങ്ങുകയും ചെയ്യും. പരശുറാം എക്സ്പ്രസ് 27ന് തിരുവനന്തപുരത്ത് യാത്ര അവസാനിപ്പിച്ച് 28ന് തിരുവനന്തപുരത്തുനിന്ന് തന്നെ മംഗലാപുരത്തേക്ക് സർവ്വീസ് നടത്തുകയും ചെയ്യും. മധുര -പുനലൂർ എക്സ്പ്രസ് 28ന് തിരുനെൽവേലിയിൽ യാത്ര അവസാനിപ്പിച്ച് 29ന് അവിടെ നിന്ന് മടക്കസർവ്വീസും നടത്തും. ബംഗളൂരുവിൽ നിന്നുള്ള ഐലന്റ് എക്സ്പ്രസ് 13,16 തീയതികളിൽ തിരുവനന്തപുരത്ത് യാത്ര അവസാനിപ്പിക്കും. 14,17 തീയതികളിൽ തിരുവനന്തപുരത്തുനിന്ന് തന്നെ മടക്കസർവ്വീസും നടത്തും. പൂനെ - കന്യാകുമാരി എക്സ്പ്രസ് 12,15 തീയതികളിൽ പാറശ്ശാലയിൽ യാത്ര അവസാനിപ്പിക്കും. ഫെബ്രുവരി 17നുള്ള കന്യാകുമാരി - വൈഷ്ണോ ദേവി എക്സ്പ്രസ് പുറപ്പെടാൻ 50മിനിറ്റ് വൈകും.