കേന്ദ്ര ബജറ്റ്: ചെറുകിട വ്യാപാരികളെ അവഗണിച്ചു

തിരുവനന്തപുരം: കേന്ദ്രബഡ്ജറ്റ് ചെറുകിട വ്യാപാരികളെ അവഗണിച്ചെന്ന് കോൺഫെഡറേഷൻ ഒഫ് ആൾ ഇന്ത്യാ ട്രേഡേഴ്സ് സംസ്ഥാന പ്രസിഡന്റ് പി.വെങ്കിട്ടരാമ അയ്യരും സെക്രട്ടറി ജനറൽ എസ്.എസ്.മനോജും പറഞ്ഞു. എല്ലാ മേഖലകളെയും സ്പർശിച്ച വികസനോന്മുഖമായതെന്ന് വിശേഷിപ്പിക്കാവുന്ന ബഡ്ജറ്റിൽ രാജ്യത്തെ സമ്പത് വ്യവസ്ഥയ്ക്ക് അടിത്തറ പാകുന്ന 8 കോടിയിയിൽ പരം വരുന്ന ചെറുകിട- ഇടത്തരം വ്യാപാരികൾക്കായി ക്ഷേമ പദ്ധതികൾ പ്രഖ്യാപിച്ചിട്ടില്ല. നിയമക്കുരുക്കിൽ എത്തിക്കുന്ന വിധത്തിലുള്ള നിലവിലെ ജി.എസ്.ടി നിയമങ്ങളിൽ മാറ്റം പ്രഖ്യാപിക്കാത്തതും, നികുതിനിർണ്ണയത്തിൽ ആംനെസ്റ്റി സ്‌കീം പ്രഖ്യാപിക്കാത്തതും തീർത്തും പ്രതിഷേധാർഹമാണ്. ഓൺലൈൻ കുത്തകകളുടെ പിടിമുറുക്കത്തിൽ തകർന്നു കൊണ്ടിരിക്കുന്ന റീട്ടെയിൽ വ്യാപാര മേഖലയെ പിടിച്ചു നിറുത്തുന്നതിന് ദേശീയ റീട്ടെയിൽ വ്യാപാര പോളിസി പ്രഖ്യാപിക്കണമെന്നാവശ്യവും പരിഗണിച്ചില്ല. ഇതുമായി ബന്ധപ്പെട്ട് സംഘടനയുടെ ദേശീയ നേതൃത്വം കേന്ദ്ര ധനമന്ത്രിയെ കണ്ട് ചർച്ച നടത്തുമെന്നും നേതാക്കൾ പറഞ്ഞു.