ചർച്ചയെ എതിർക്കുന്നത് ജനാധിപത്യവിരുദ്ധം: സുരേന്ദ്രൻ

തിരുവനന്തപുരം: ആർ.എസ്.എസുമായി മുസ്ലീം സംഘടനകൾ ചർച്ചചെയ്യരുതെന്ന പിണറായി വിജയന്റെ നിലപാട് ജനാധിപത്യവിരുദ്ധമാണെന്ന് ബി.ജെ.പി സംസ്ഥാനഅദ്ധ്യക്ഷൻ കെ. സുരേന്ദ്രൻ പറഞ്ഞു. മുഖ്യമന്ത്രി ആഗ്രഹിക്കുന്നത് മതങ്ങൾ തമ്മിലുള്ള സംഘർഷമാണ്. ഇത്തരത്തിൽ തമ്മിലടിച്ചാലേ സി.പി.എമ്മിന് മുതലെടുപ്പ് നടത്താനാകു. മുസ്ലീം സംരക്ഷകർ ചമഞ്ഞ് ആ സമുദായത്തെ അപകടത്തിലാക്കാനാണ് സി.പി.എം ശ്രമിച്ചിട്ടുള്ളത്. സി.പി.എമ്മിന്റെ മുസ്ലീം പ്രീണനം തീവ്രവാദശക്തികൾക്ക് മാത്രമേ ഗുണം ചെയ്തിട്ടുള്ളൂ. മുസ്ലീം സമുദായത്തിന് സി.പി.എമ്മിന്റെ ഇരട്ടത്താപ്പ് തിരിച്ചറിയാൻ സാധിക്കുമെന്ന് സുരേന്ദ്രൻ പറഞ്ഞു. രാജ്യത്ത് ഇല്ലാത്ത പ്രശ്നങ്ങൾ സൃഷ്ടിച്ച് മതസ്പർദ്ധയുണ്ടാക്കി കലക്കവെള്ളത്തിൽ മീൻപിടിക്കുകയാണ് യെച്ചൂരിയും പിണറായിയും മറ്റ് ഇടത് നേതാക്കളും ചെയ്തുവരുന്നത്. നരേന്ദ്രമോദി ഭരണത്തിൽ രാജ്യത്ത് വർഗീയ കലാപങ്ങളില്ലാത്തത് ഇടതുപക്ഷത്തെ കുറച്ചൊന്നുമല്ല അസ്വസ്ഥരാക്കുന്നതെന്നും സുരേന്ദ്രൻ പറഞ്ഞു.