പിക്കപ്പ് വാൻ തട്ടി ലെവൽക്രോസ് തകർന്നു, ഗതാഗതക്കുരുക്ക്

അമ്പലപ്പുഴ: അടച്ചിട്ടിരുന്ന റെയിൽവെ ക്രോസ് ബാർ പിക്കപ്പ് വാൻ തട്ടി തകരാറിലായി. അമ്പലപ്പുഴ-തിരുവല്ല സംസ്ഥാന പാതയിൽ തകഴി റെയിൽവെ ലെവൽ ക്രോസിൽ ഇന്നലെ രാത്രി 7ഓടെ ആയിരുന്നു സംഭവം.

കൊച്ചുവേളി എക്സ്‌പ്രസ് കടന്നു പോകാൻ അടച്ച ക്രോസിൽ തിരുവല്ല ഭാഗത്തു നിന്നെത്തി​യ പിക്കപ്പ് വാൻ തട്ടുകയായിരുന്നു. ഇതോടെ ക്രോസ് ബാർ തുറക്കാൻ പറ്റാത്ത അവസ്ഥയിലായി. സിഗ്നൽ സംവിധാനവും തകരാറിലായതിനെ തുടർന്ന് എൻജി​നീയറിംഗ് ടീം എത്തിയാൽ മാത്രമേ തകരാർ പരിഹരിക്കാനാവൂ എന്ന് റെയിൽവെ അധികൃതർ അറിയിച്ചു. എ-സി റോഡ് പുനർനിർമ്മാണം നടക്കുന്നതിനാൽ അമ്പലപ്പുഴ- തിരുവല്ല സംസ്ഥാന പാതയിൽ വാഹനങ്ങളുടെ വൻ തിരക്കാണിപ്പോൾ. ഇതോടെ ഇരു ഭാഗങ്ങളിൽ നിന്നും വന്ന വാഹനങ്ങൾ ഗതാഗതക്കുരുക്കിലായി. അമ്പലപ്പുഴ പൊലീസ് എത്തി വാഹനങ്ങൾ മറ്റു റോഡുകളിലൂടെ കടത്തിവിട്ട് ഗതാഗതം നിയന്ത്രിച്ചു.