കൊച്ചി: എറണാകുളം ജില്ലാ കളക്ടറായി എൻ എസ് കെ ഉമേഷ് ചുമതലയേറ്റു. ബ്രഹ്മപുരത്തെ പ്രശ്നങ്ങൾ പരിഹരിക്കാൻ ടീമായി പ്രവർത്തിക്കുമെന്നും ജനങ്ങളുടെ സഹകരണം പ്രതീക്ഷിക്കുന്നുവെന്നും അദ്ദേഹം പ്രതികരിച്ചു. 'ഞാൻ ഇന്ന് ജോയിൻ ചെയ്തതേയുള്ളൂ. എല്ലാ ഡിപ്പാർട്ടുമെന്റുകളുടെയും പിന്തുണയോടെ നമ്മൾ പ്രശ്നം പരിഹരിക്കും.' - അദ്ദേഹം വ്യക്തമാക്കി.
അതേസമയം, എൻ എസ് കെ ഉമേഷിന് ചുമതല കൈമാറാൻ മുൻ കളക്ടർ രേണു രാജ് എത്തിയില്ല. ബ്രഹ്മപുരം തീപിടിത്തവുമായി ബന്ധപ്പെട്ടുണ്ടായ വിവാദങ്ങൾക്കിടെ കഴിഞ്ഞ ദിവസമാണ് രേണു രാജിനെ വയനാട്ടിലേക്ക് സ്ഥലം മാറ്റിയത്. മാലിന്യ സംസ്കരണ പ്ലാന്റിലെ തീപിടിത്തം ഒരാഴ്ച കഴിഞ്ഞിട്ടും അണയ്ക്കാൻ കഴിയാതെ വരികയും ഹൈക്കോടതി വിളിച്ചുവരുത്തി രൂക്ഷമായി വിമർശിക്കുകയും ചെയ്തതോടെയാണ് കളക്ടറെ സ്ഥലം മാറ്റിയത്.
ഇതിൽ തനിക്ക് പ്രതിഷേധം ഉണ്ടെന്ന് തോന്നിപ്പിക്കുന്ന രീതിയിലുള്ള കുറിപ്പ് വനിതാ ദിനമായ ഇന്നലെ രേണു രാജ് ഫേസ്ബുക്കിൽ പങ്കുവച്ചിരുന്നു. ''നീ പെണ്ണാണ് എന്ന് കേൾക്കുന്നത് അഭിമാനമാണ്. നീ 'വെറും' പെണ്ണാണ് എന്നു പറയുന്നിടത്താണ് പ്രതിഷേധം'- എന്നാണ് അവർ ഫേസ്ബുക്കിൽ കുറിച്ചത്. 2022 ജൂലായ് 27നായിരുന്നു രേണു രാജ് എറണാകുളം ജില്ലാ കളക്ടറായി ചുമതലയേറ്റത്.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |