സുരാജും രതീഷ് ബാലകൃഷ്ണൻ പൊതുവാളും വീണ്ടും

രതീഷ് ബാലകൃഷ്ണൻ പൊതുവാൾ സംവിധാനം ചെയ്യുന്ന ചിത്രത്തിൽ വീണ്ടും സുരാജ് വെഞ്ഞാറമൂട്. രതീഷ് ബാലകൃഷ്ണൻ പൊതുവാളിന്റെ ന്നാ, താൻ കേസ് കൊട് എന്ന ചിത്രത്തിലൂടെ ശ്രദ്ധേയരായ രാജേഷ് മാധവൻ, ചിത്ര നായർ എന്നിവർ ആദ്യമായി നായകനും നായികയുമായി അഭിനയിക്കുന്ന പേരിടാത്ത ചിത്രത്തിൽ പ്രധാന കഥാപാത്രമായാണ് സുരാജ് വെഞ്ഞാറമൂട് എത്തുന്നത്. സുരാജിന് മികച്ച നടനുള്ള സംസ്ഥാന പുരസ്കാരം നേടികൊടുത്ത ആൻഡ്രോയ്ഡ് കുഞ്ഞപ്പൻ എന്ന ചിത്രത്തിന്റെ സംവിധായകനാണ് രതീഷ്. സുരാജിന്റെ അഭിനയ ജീവിതത്തിലെ ഏറ്റവും മികച്ച കഥാപാത്രമാണ് ആൻഡ്രോയ്ഡ് കുഞ്ഞപ്പനിലെ ഭാസ്ക‌‌ര പൊതുവാൾ. രതീഷ് ബാലകൃഷ്ണൻ പൊതുവാളിന്റെ രചനയിൽ നവാഗതനായ സുധീഷ് ഗോപിനാഥ് സംവിധാനം ചെയ്ത വിഷുവിന് എത്തിയ മദനോത്സവത്തിലും സുരാജ് തിളങ്ങിയിരുന്നു. രതീഷ് ബാലകൃഷ്ണൻ പൊതുവാളിന്റെ പുതിയ ചിത്രത്തിന്റെ ചിത്രീകരണം മേയ് രണ്ടാം വാരം കണ്ണൂരിൽ ആരംഭിക്കും. ചിത്രത്തിൽ കുഞ്ചാക്കോ ബോബൻ അഭിനയിക്കുന്നില്ല. മഹേഷിന്റെ പ്രതികാരത്തിലൂടെ അഭിനേതാവായി എത്തിയ രാജേഷ് മാധവൻ കാസ്റ്റിംഗ് ഡയറക്ടർ എന്ന നിലയിലും പ്രശസ്തനാണ്. ന്നാ താൻ കേസ് കൊട് എന്ന ചിത്രത്തിൽ സുരേശേട്ടൻ എന്ന കഥാപാത്രത്തിലൂടെ രാജേഷ് മാധവൻ കൂടുതൽ പ്രിയങ്കരനായി തീർന്നു. ചിത്രത്തിൽ സുമലത ടീച്ചർ എന്ന കഥാപാത്രമായി ചിത്രയും പ്രേക്ഷകരെ വിസ്മയിപ്പിച്ചു. സുരേശൻ, സുമലത എന്നീ കഥാപാത്രങ്ങളെതന്നെ വീണ്ടും അവതരിപ്പിച്ചാണ് ഇരുവരും ആദ്യമായി നായകനും നായികയുമാകുന്നത്.