ദേശീയപാതയിൽ വാഹനങ്ങളുടെ കൂട്ടിയിടി

തുറവൂർ: ദേശീയപാതയിൽ വാഹനങ്ങളുടെ കൂട്ടിയിടി, മൂന്ന് വാഹനങ്ങൾ തകർന്നു. ദേശീയ പാതയിൽ പൊന്നാം വെളി പത്മാക്ഷി കവലയ്ക്ക് സമീപം ഇന്നലെ ഉച്ചയ്ക്ക് 2 നായിരുന്നു അപകടം. ചേർത്തല ഭാഗത്ത് നിന്ന് എറണാകുളം ഭാഗത്തേക്ക് പോവുകയായിരുന്ന കാർ മുന്നിൽ പോകുകയായിരുന്ന ബൈക്കിൽ ഇടിച്ചു. തുടർന്ന് നിയന്ത്രണം വിട്ട കാർ റോഡിന്റെ വശത്ത് പാർക്ക് ചെയ്തിരുന്ന മറ്റൊരു ഇന്നോവ കാറിൽ ഇടിക്കുകയായിരുന്നു. തുടർന്ന് മുന്നോട്ട് പാഞ്ഞ കാർ ഇലക്ട്രിക്ക് പോസ്റ്റിലിടിച്ചാണ് നിന്നത്. ബൈക്ക് യാത്രികന് പരിക്കേറ്റു. കാറുകൾ ഭാഗികമായി തകർന്നു .അപകടത്തെ തുടർന്ന് ദേശീയപാതയിൽ ഗതാഗതം ഭാഗികമായി തടസ്സപ്പെട്ടു. പട്ടണക്കാട് പൊലീസ് കേസെടുത്തു