കൊച്ചി: മൂന്നുവർഷം മുമ്പ് പിതാവ് തോമസ് ഫെർണാണ്ടസ് മരിക്കുമ്പോൾ മൂലമ്പള്ളി മാളിയേക്കൽ വീട്ടിൽ മോനി​ക്ക നയന ഫെർണാണ്ടസിന് പ്രായം 18. ചേച്ചി നൊറീന. അനിയത്തി നസ്‌ന. ഏറ്റവും ഇളയ അനിയത്തി ഒരു വയസുള്ള നോറ (ഇപ്പോൾ യു.കെ. ജിയിൽ)​. അമ്മൂമ്മ പൗളിൻ. അമ്മ സോണി. ഒരു സെന്റി​ലെ മൂന്നുനി​ല വീട് അക്ഷരാർത്ഥത്തി​ൽ പെൺ​വീട്. ആറു കുടുംബാംഗങ്ങളും പെണ്ണുങ്ങൾ.

അർബുദം സ്ഥി​രീകരി​ച്ച് ഒരു മാസത്തി​നുള്ളിലായി​രുന്നു ടാക്സിഡ്രൈവറായി​രുന്ന തോമസി​ന്റെ മരണം. മഹാരാജാസ് കോളേജിൽ ആദ്യവർഷ ബി​.എ മലയാളം വി​ദ്യാർത്ഥി​യായി​രുന്ന മോനി​ക്കയ്ക്ക് വി​ഷമി​ച്ചു നി​ൽക്കാൻ സമയമി​ല്ലായി​രുന്നു. വീടി​ന്റെ ചുമതല ഏറ്റെടുത്തു.

മോനിക്കയ്ക്ക് ആകെ അറി​യാവുന്ന പണി കേക്ക് തയ്യാറാക്കലായി​രുന്നു. അതുതന്നെയാണ് തുണയായത്. യൂട്യൂബി​ൽനി​ന്ന് പഠി​ച്ച വി​ദ്യ. അതിലൂടെ മോനിക്ക കുടുംബത്തി​ന് ആശ്രയമായി​. രാത്രി മൂന്നു മണിവരെ കേക്കുണ്ടാക്കും. പൂ‌ർത്തിയാവാത്തത് പുലർച്ചെ 6 മണിക്ക് എഴുന്നേറ്റ് ചെയ്യും.

കേക്കുണ്ടാക്കി ആവശ്യക്കാർക്ക് സ്വന്തം സ്കൂട്ടറിൽ എത്തിക്കും. 650 മുതൽ 3000 രൂപ വരെ വിലയുള്ള കേക്കുകളാണ് നിർമ്മിക്കുന്നത്. മാസം 10,000 രൂപ വായ്പകളുടെ തി​രി​ച്ചടവി​ന് വേണം. വീട്ടുചെലവും നാൽവർ സംഘത്തി​ന്റെ പഠനച്ചെലവും ഇതിൽ നി​ന്നു വേണം കണ്ടെത്താൻ.

തുടക്കത്തി​ൽ അടുത്ത ബന്ധുക്കൾ കേക്ക് വാങ്ങി​ സഹായി​ച്ചു. മറ്റുള്ളവരുടെ ഓർഡറുകൾ എടുത്തുകൊടുത്തു. പി​ന്നെ എഫ്.എസ്.എസ്.എ.ഐ ( ഫുഡ് സേഫ്‌റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ ) രജിസ്ട്രേഷനെടുത്ത് മോനി​ക്ക കേക്ക് നിർമ്മാണത്തിൽ ശ്രദ്ധ കേന്ദ്രീകരിക്കുകയായിരുന്നു. ഇപ്പോൾ ദിവസം അഞ്ച് ഓർഡറുകൾ വരെ ലഭിക്കുന്നുണ്ട്. ജില്ലയ്ക്ക് പുറത്തുനിന്ന് ഓർഡറുകളുണ്ടെങ്കി​ലും എത്തിക്കാനുള്ള ബുദ്ധിമുട്ട് കാരണം ഏറ്രെടുക്കാറില്ല.

പഠനത്തോടൊപ്പം ബിസിനസ്

ക്ലാസിലിരിക്കുമ്പോൾ ഓർഡറുകൾ എത്തി​യാൽ ഓടി വീട്ടിലെത്തുമെന്ന് മോനിക്ക പറഞ്ഞു. പാഠങ്ങൾ അദ്ധ്യാപകരും കൂട്ടുകാരും പറഞ്ഞുകൊടുക്കും. കൊവിഡ്കാലത്ത് ഓർഡറുകൾ കുറഞ്ഞപ്പോൾ പ്രതി​സന്ധി​യുണ്ടായി​. എങ്കി​ലും തട്ടി​മുട്ടി​ മറി​കടന്നു.

ആലുവ സെന്റ് സേവ്യേഴ്സ് കോളേജിൽ മലയാളം എം.എ വി​ദ്യാർത്ഥി​നി​യാണ്. ബി.എഡിന് ചേരാനുള്ള തയ്യാറെടുപ്പിലുമാണ്.

അദ്ധ്യാപിക ആകാനാണ് ആഗ്രഹം. ബിസിനസ് ഉപേക്ഷിക്കാനും പറ്റില്ല. ഫുഡ്ക്രാഫ്റ്റ്സ് കോഴ്സ് ചെയ്യണം. കേക്ക് ഷോപ്പും ആരംഭിക്കണം.

മോനിക്ക നയന ഫെർണാണ്ടസ്