1.63 ലക്ഷത്തിന് പിസ,​ പിന്നാലെ വിമർശനം

ലണ്ടൻ : ജനപ്രിയ ഇറ്റാലിയൻ വിഭവമാണ് പിസ. പലതരം പിസകളെ പറ്റി നാം കേട്ടിരിക്കാം. എന്നാൽ,​ 2,000 ഡോളർ അഥവാ 1.63 ലക്ഷം രൂപ വിലയുള്ള സ്പെഷ്യൽ പിസയെ പറ്റി കേട്ടിട്ടുണ്ടോ ?​ യു.എസിലെ ലോസ്ആഞ്ചലസ് ആസ്ഥാനമാക്കി പ്രവർത്തിക്കുന്ന ബ്രൂക്ക് ബേവ്‌സ്കി എന്ന ഷെഫാണ് ഈ പിസയ്ക്ക് പിന്നിൽ. ബ്രൂക്ക് ഒരു സെലിബ്രിറ്റിക്ക് വേണ്ടിയാണ് ഈ പിസ തയ്യാറാക്കിയത്. സെലിബ്രി​റ്റി ആരാണെന്ന് ബ്രൂക്ക് വെളിപ്പെടുത്തിയിട്ടില്ല.

ന്യൂസിലൻഡിൽ നിന്ന് ഇറക്കുമതി ചെയ്ത ഓർഗാനിക് മനുകാ തേൻ, കാവീയർ, 24 കാര​റ്റ് ഗോൾഡ് ഫ്ലേക്സ് അടങ്ങിയ വീഗൻ പെസ്​റ്റോ തുടങ്ങിയ വില കൂടിയ വസ്തുക്കൾക്കൊപ്പം ഓർഗാനിക് ഫിഗ്സ്, ബദാം, കാഷ്യുനട്ട്, ഗ്ലൂട്ടൻ ഫ്രീ ധാന്യ മാവുകൾ, ചെറി ടുമാറ്റോ തുടങ്ങി പോഷക ഗുണങ്ങൾ അടങ്ങിയ നിരവധി ചേരുവകളും ഈ സ്പെഷ്യൽ പിസയുടെ പ്രത്യേകതയാണ്.

ഏകദേശം 82,000 രൂപയാണ് ( 1,000 ഡോളർ ) പിസയുടെ ചേരുവകൾക്ക് മാത്രം വേണ്ടി വന്നത്. പിസയുടെ നിർമ്മാണത്തിന്റെ ഓരോ ഘട്ടവും വിവരിക്കുന്ന വീഡിയോ ബ്രൂക്ക് സോഷ്യൽ മീഡിയയിൽ പങ്കുവച്ചിട്ടുണ്ട്. ബ്രൂക്കിനെ അഭിനന്ദിച്ച് ചിലർ എത്തിയെങ്കിലും നിരവധി പേരാണ് വിമർശനവുമായി രംഗത്തെത്തിയത്. രാജ്യം കടുത്ത വിലക്കയറ്റം നേരിടുന്നതിനിടെ ഈ പിസയുണ്ടാക്കാൻ വേണ്ട പണം കൊണ്ട് എത്രയോ പാവങ്ങൾക്ക് ആഹാരം നൽകാമായിരുന്നു എന്നാണ് പലരും ചോദിക്കുന്നത്.