തിരുവനന്തപുരം: ലോക്‌സഭാ തിരഞ്ഞെടുപ്പിൽ തൃശൂരിൽ സുരേഷ് ഗോപി ജയിക്കുമെന്നാണ് അവിടെയുള്ളവർ പറയുന്നതെന്ന് നടൻ ബൈജു. അദ്ദേഹം ജയിച്ചാൽ ജില്ലയ്ക്ക് പ്രയോജനമുണ്ടാകുമെന്നും ബൈജു അഭിപ്രായപ്പെട്ടു. ഒരു മാദ്ധ്യമത്തിന് നൽകിയ അഭിമുഖത്തിൽ സംസാരിക്കുകയായിരുന്നു നടൻ.

'തൃശൂരിൽ സുരേഷ് ഗോപിയും മത്സരിക്കുന്നുണ്ട്. അവിടെയുള്ളവർ പറയുന്നത് ഇത്തവണ സുരേഷ് ഗോപി ജയിക്കുമെന്നാണ്. കേന്ദ്രത്തിൽ എന്തായാലും ബി ജെ പിയേ വരൂവെന്നാണ് ഞാൻ കരുതുന്നത്. അതുകൊണ്ട് തന്നെ സുരേഷ് ഗോപി ജയിച്ചാൽ തൃശൂരിന് എന്തെങ്കിലും പ്രയോജനമുണ്ടായേക്കും.'- ബൈജു വ്യക്തമാക്കി.

'ഇത്തവണ ജയിച്ചില്ലെങ്കിൽ ഒരിക്കലും മത്സരിക്കാൻ പോകരുതെന്ന് ഞാൻ അദ്ദേഹത്തോട് പറഞ്ഞിരുന്നു. ഇത് അവസാനമത്സരമായിരിക്കണമെന്ന് പറഞ്ഞപ്പോൾ പിന്നെ മത്സരിക്കില്ലെന്നാണ് അദ്ദേഹം പറഞ്ഞത്. ഇനി തൃശൂർക്കാരാണ് തീരുമാനിക്കേണ്ടത്.' -ബൈജു അഭിപ്രായപ്പെട്ടു. അതേസമയം, മുകേഷിന് ഇനി സീറ്റ് കിട്ടുമോയെന്നറിയില്ലെന്നും ബൈജു കൂട്ടിച്ചേർത്തു.