മുഖ്യമന്ത്രിക്ക് പിറന്നാൾ ആശംസ നേർന്ന്, രാഷ്ട്രപതിയും മോദിയുമുൾപ്പെടെ പ്രമുഖർ മന്ത്രിമാരുടെ 'ഹാപ്പി ബെർത്ത്ഡേ' വേറെ

തിരുവനന്തപുരം: മുഖ്യമന്ത്രി പിണറായി വിജയന് ജന്മദിനാശംസകൾ നേർന്ന് രാഷ്ട്രീയ, സാമൂഹ്യ, സാംസ്കാരിക രംഗങ്ങളിലെ പ്രമുഖർ. രാഷ്ട്രപതി ദ്രൗപദി മുർമു, ഉപരാഷ്ട്രപതി ജഗദീപ് ധൻകർ, കേന്ദ്ര ആഭ്യന്തരമന്ത്രി അമിത് ഷാ എന്നിവർ മുഖ്യമന്ത്രിയെ വിളിച്ച് പിറന്നാളാശംസ അറിയിച്ചപ്പോൾ പ്രധാനമന്ത്രി നരേന്ദ്രമോദി ട്വിറ്ററിലൂടെ ആശംസ നേർന്നു. രാവിലെ 9 മണിക്ക് മന്ത്രിസഭായോഗം ആരംഭിക്കും മുമ്പുതന്നെ മന്ത്രിമാരെല്ലാവരും മുഖ്യമന്ത്രിക്ക് 'ഹാപ്പി ബർത്ത്ഡേ" ആശംസിച്ചു. തിരുവനന്തപുരത്തില്ലാതിരുന്ന ഗവർണർ ആരിഫ് മുഹമ്മദ് ഖാന്റെ ആശംസാസന്ദേശം രാജ്ഭവനിൽ നിന്നെത്തിച്ചു.

ലോക്സഭാ സ്പീക്കർ ഓം ബിർള, തമിഴ്നാട് മുഖ്യമന്ത്രി എം.കെ. സ്റ്റാലിൻ, അസാം മുഖ്യമന്ത്രി ഹിമന്ത ബിശ്വ ശർമ്മ, കേന്ദ്രമന്ത്രിമാരായ നിധിൻ ഗഡ്കരി, രാജീവ് ചന്ദ്രശേഖർ, മുൻ പ്രതിപക്ഷ നേതാവ് രമേശ് ചെന്നിത്തല, മുൻ കേന്ദ്രമന്ത്രി സുരേഷ് പ്രഭു, രാജ്യസഭാംഗം രാജീവ് ശുക്ല, ഇന്ത്യയിലെ ഒാസ്‌ട്രേലിയൻ ഹൈക്കമ്മിഷണർ ബാരി ഒ ഫാരൽ, ചലച്ചിത്ര താരങ്ങളായ കമലഹാസൻ, മമ്മൂട്ടി, മോഹൻലാൽ , സുരാജ് വെഞ്ഞാറമൂട്, കഥാകൃത്ത് ടി. പത്മനാഭൻ, ഫുട്‌ബാൾ താരം സി.കെ. വിനീത്, മന്ത്രിമാർ, എം.പിമാർ, എം.എൽ.എമാർ, സാമൂഹ്യ, സാംസ്‌കാരിക മേഖലകളിലെ പ്രമുഖർ, വിവിധ മതമേലദ്ധ്യക്ഷന്മാർ എന്നിവരും മുഖ്യമന്ത്രിക്ക് പിറന്നാൾ ആശംസകൾ നേർന്നു.

'കരുത്തോടെ നേര് കാക്കുന്ന സഖാവിന് ജന്മദിനാശംസകൾ" എന്ന് ഫേസ്ബുക്കിൽ മന്ത്രി പി.എ. മുഹമ്മദ് റിയാസ് മുഖ്യമന്ത്രിയുടെ ചിത്രം പങ്കുവച്ച് ആശംസ നേർന്നു. കൊകാറ്റൂ തത്തയെ മുഖ്യമന്ത്രി കൈയിലേന്തി നിൽക്കുന്ന ചിത്രമാണ് പങ്കുവച്ചത്.