കരുവന്നൂരിൽ തെറ്റായ നിലപാടുണ്ടായി: എം.വി. ഗോവിന്ദൻ

കണ്ണൂർ: കരുവന്നൂർ ബാങ്ക് വിഷയത്തിൽ തെറ്റായ നിലപാടുണ്ടായിട്ടുണ്ടെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ പറഞ്ഞു. പയ്യന്നൂരിൽ മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

ഇക്കാര്യത്തിൽ പാർട്ടി കൃത്യമായ നിലപാടാണ് എടുത്തിട്ടുള്ളത്. ആ പ്രശ്നം പരിഹരിച്ചു കഴിഞ്ഞു. തെറ്റായ പ്രവണത മാറ്റി ശരിയായ ദിശയിലേക്ക് നയിക്കുക എന്നതാണ് ചെയ്തു കൊണ്ടിരിക്കുന്നത്. ആ നിലപാടിൽ ഒരു വിട്ടുവീഴ്ച്ചയും ചെയ്യാൻ പാർട്ടി ഉദ്ദേശിച്ചിട്ടില്ല.

അവിടെയുണ്ടായ ശരിയല്ലാത്ത നിലപാടിനെ ശരി എന്ന് പറയണോ? സഹകരണ മേഖലയുടെ മുഖം ചില പ്രശ്‌നങ്ങളുണ്ടാക്കി വികൃതമാക്കാൻ നിങ്ങളെപ്പോലുള്ളവർ ശ്രമിക്കുകയാണെന്നും എം.വി. ഗോവിന്ദൻ പറഞ്ഞു.