പത്ത് ഉപകരണങ്ങളുടെ ജോലി ഒറ്റയ്ക്ക് ചെയ്യും, അടുക്കളയിൽ ഇത് ഉണ്ടെങ്കിൽ മിനിട്ടുകൾക്കകം എല്ലാം റെഡി

ഇന്നത്തെ തിരക്ക് പിടിച്ച് കാലത്ത് ഒരുപാട് വിഭവങ്ങൾ തയ്യാറാക്കാൻ പാടുപെടുന്നവരാണ് കൂടുതൽ പേരും. വീട്ടിലെ അംഗങ്ങളിൽ കൂടുതൽ പേരും പഠനത്തിനും ജോലിക്കും പോകുന്നവരായതിനാൽ വിഭവങ്ങൾ തയ്യാറാക്കാൻ നെട്ടോട്ടമായിരിക്കും രാവിലെ അടുക്കളയിൽ. അങ്ങനെയുള്ളവർക്ക് ഏറ്റവും ഉപകാരപ്പെടുന്ന ഒന്നാണ് ഇൻസ്റ്റന്റ് പോട്ട്. വീട്ടിലെ പല ഉപകരണങ്ങളുടെ ഉപയോഗം ഒറ്റ ഉപകരണത്തിൽ എന്നതാണ് ഇൻസ്റ്റന്റ് പോട്ടിന്റെ പ്രത്യേകത.

മൾട്ടി കുക്കർ എന്ന് വേണമെങ്കിൽ ഇൻസ്റ്റന്റ് പോട്ടിനെ വിളിക്കാം. സൂപ്പ്, ഇറച്ചി, ബീൻസ്, കോഴിയിറച്ചി, കുറഞ്ഞ വേവ്, ചോറ്, മൾട്ടി ഗ്രെയ്‌ൻ, കഞ്ഞി, ആവി കയറ്റാനുള്ളവ, തൈര്, പ്രഷർ കുക്കർ എന്നിങ്ങനെയുള്ള ഓപ്‌ഷനുകളാണ് ഇൻസ്റ്റന്റ് പോട്ടിലുള്ളത്. വൈദ്യുതിയിൽ പ്രവർത്തിക്കുന്ന ഈ മൾട്ടി കുക്കറിന്റെ പ്രവർത്തനം എങ്ങനെയാണെന്ന് നോക്കിയാലോ?

• 'സോട്ടെ ഫംഗ്‌ഷൻ' എന്ന ബട്ടണിൽ പ്രസ് ചെയ്ത് ഇൻസ്റ്റന്റ് പോട്ട് ചൂടാക്കുകയാണ് ആദ്യം ചെയ്യേണ്ടത്. ലോ, മീഡിയം, ഹൈ ഹീറ്റ് എന്നിങ്ങനെ ചൂട് കുറയ്ക്കുകയോ കൂട്ടുകയോ ചെയ്യാം. പോട്ട് കൃത്യമായ ചൂടിലെത്തി കഴിയുമ്പോൾ ഒരു ബീപ്പ് സൗണ്ട് കേൾക്കും.
• അടുത്തതായി കുക്കറിനകത്ത് വേവിക്കാനുള്ള സാധനങ്ങൾ ഇട്ടതിനുശേഷം ലിഡ് നന്നായി അടയ്ക്കണം.
• ലിഡിന് മുകളിലുള്ള നോബ് സീലിംഗ് എന്ന ഓപ്‌ഷനിൽ ആണോയെന്ന് പരിശോധിക്കണം.
• ഇനി മാന്വൽ ഫംഗ്ഷനിലോ പ്രഷർ ഫംഗ്‌ഷനിലോ ഇട്ട് ആഹാരത്തിന്റെ പ്രത്യേകത അനുസരിച്ച് വേവിച്ചെടുക്കാവുന്നതാണ്. വേവ് കൂടുതൽ ആവശ്യമായവയ്ക്ക് പ്രഷർ കുക്കർ മോഡ് തിരഞ്ഞെടുക്കാം.
• ആഹാരം വെന്ത് വരാനുള്ള സമയവും നമുക്ക് തന്നെ സെറ്റ് ചെയ്യാവുന്നതാണ്. എത്രയും വേഗത്തിൽ വേകണോ അത്രയും കുറവ് സമയം സെറ്റ് ചെയ്യാം.
• സെറ്റ് ചെയ്ത സമയം കഴിഞ്ഞയുടൻതന്നെ ആഹാരം പുറത്തെടുക്കണമെങ്കിൽ ക്വുക്ക് റിലീസ് എന്ന് ഓപ്‌ഷൻ ഉപയോഗിക്കാം.
• ഇങ്ങനെ ചെയ്ത് കഴിഞ്ഞ് നോബ് മുകളിലേയ്ക്ക് ആയി കഴിഞ്ഞാൽ ലിഡ് തുറക്കാം.
• ആവശ്യത്തിന് ആഹാരം എടുത്ത് കഴിഞ്ഞാൽ കീപ്പ് വാം ഓപ്ഷനിൽ ആഹാരം സൂക്ഷിക്കാം. പത്ത് മണിക്കൂർവരെ ആഹാരം ചൂടായി ഇരിക്കും.