ശിക്ഷ ഉറപ്പാക്കണം: വി.ഡി.സതീശൻ

തിരുവനന്തപുരം: മെഡിക്കൽ കോളേജ് പി.ജി വിദ്യാർത്ഥി ഡോ. എ.ജെ.ഷഹനയുടെ ആത്മഹത്യയിൽ കുറ്റക്കാർക്ക് മാതൃകാപരമായ ശിക്ഷ ഉറപ്പാക്കണമെന്ന് പ്രതിപക്ഷേനതാവ് വി.ഡി.സതീശൻ ആവശ്യപ്പെട്ടു. കാര്യക്ഷമമായി അന്വേഷിക്കണം. ഇത്തരം സംഭവങ്ങൾ നമ്മുടെ നാട്ടിൽ ആവർത്തിക്കുകയാണ്. സ്ത്രീധന നിരോധന നിയമം കാലഘട്ടത്തിന് അനുസരിച്ച് പരിഷ്‌കരിക്കണമെന്നും അദ്ദേഹം ആവശ്യപ്പെട്ടു.

കർശന നിയമ നിർമ്മാണത്തിലൂടെയും ബോധവത്ക്കരണത്തിലൂടെയും ഇത്തരം സംഭവങ്ങൾ ഉണ്ടാകില്ലെന്ന് ഉറപ്പുവരുത്തണം. പെൺകുട്ടികൾ വിചാരിച്ചാൽ സ്ത്രീധനവുമായി ബന്ധപ്പെട്ട കുറ്റകൃത്യങ്ങൾ അവസാനിപ്പിക്കാനാകില്ല. സമൂഹത്തിലാകെ സ്ത്രീധനത്തിന് എതിരായ മനോനില പാകപ്പെട്ടു വരണം. ഇതിൽ വനിതാ കമ്മിഷനും സർക്കാർ സംവിധാനങ്ങൾക്കും നിർണായക പങ്കുണ്ടെന്നും അദ്ദേഹം വ്യക്തമാക്കി.