ഫൈവ് സ്റ്റാർ ആഴ്സണൽ, ഓരോന്നടിച്ച് ചെൽസി, സിറ്റി

ലണ്ടൻ: ഇംഗ്ലീഷ് പ്രിമിയർ ലീഗിൽ കഴിഞ്ഞ ദിവസം നടന്നമത്സരത്തിൽ ബേൺലിയെ മറുപടിയില്ലാത്ത അഞ്ച് ഗോളുകൾക്ക് തകർത്ത് ആഴ്സണൽ പോയിന്റ് ടേബിളിൽ രണ്ടാം സ്ഥാനത്തെത്തി. രണ്ടാം സ്ഥാനത്തുണ്ടായിരുന്ന നിലവിലെ ചാമ്പ്യൻമാരായ മാഞ്ചസ്റ്റർ സിറ്റി ചെൽസിയോട് 1-1 ന്റെ സമനിലയിൽ കുരുങ്ങിയതും ആഴ്സനലിന് അനുഗ്രഹമായി. ബുക്കായാ സാക്ക ഇരട്ടഗോളുമായി തിളങ്ങിയ.പ്പോൾ ഒഡേഗാർഡ്,​ട്രൊസ്സാർഡ്,​ ഹാവേർട്ട്സ് എന്നിവർ ആഴ്സനലിനായി ഓരോ ഗോൾ വീതം നേടി.

ചെഷസിക്കെതിരെ സ്വന്തം തട്ടകത്തിൽ നടന്ന മത്സരത്തിൽ ഒരുഗോളിന് പിന്നിൽ നിന്ന ശേഷമാണ് അവസാന പാദത്തിൽ നേടിയഗോളിന്റെ പിൻബലത്തിൽ മാഞ്ചസ്റ്റർ സിറ്റി സമനില നേടിയത്. ചെൽസിക്കായി 42-ാം മിനിട്ടിൽ സ്റ്റെർലിംഗും സിറ്റിക്കായി 82-ാം മിനിട്ടിൽ റോഡ്രിയും ഗോളുകൾ നേടി. ആഴ്സനലിന് 25 മത്സരങ്ങളിൽ നിന്ന് 55 പോയിന്റും സിറ്റിയ്ക്ക് 24 മത്സരങ്ങളിൽ നിന്ന് 53 പോയിന്റുമാണുള്ളത്.