മലപ്പുറം: ദേശീയപാതയിൽ കൊട്ടപ്പുറം മുതൽ എയർപോർട്ട് ജംഗ്ഷൻ വരെ ബസിന് മുൻപിൽ വടിവാൾ വീശി ഓട്ടോ ഡ്രെെവർ. ബസ് ജീവനക്കാർ കൊണ്ടോട്ടി പൊലീസിൽ പരാതി നൽകിയിട്ടുണ്ട്. കോഴിക്കോട്ട് നിന്ന് മഞ്ചേരിയിലേക്ക് പോകുകയായിരുന്ന സ്വകാര്യ ബസിന് മുൻപിലാണ് ഓട്ടോ ഡ്രെെവർ വടിവാൾ വീശിയത്. വെള്ളിയാഴ്ച വെെകിട്ട് 6.30നാണ് സംഭവം നടന്നത്. ഇതിന്റെ വീഡിയോ ദൃശ്യങ്ങൾ പുറത്തുവന്നിട്ടുണ്ട്.
'പുളിക്കലിൽ ബസ് നിർത്തിയപ്പോഴാണ് പ്രായമായ സ്ത്രീ ഉൾപ്പെടെ രണ്ട് സ്ത്രീകൾ ഇറങ്ങാനുണ്ടായിരുന്നു. അവർ സാവധാനമാണ് ഇറങ്ങിയത്. ഇതിനിടെ പിറകിൽ നിന്ന് ഒരു ഓട്ടോറിക്ഷ ഹോണടിക്കുന്നുണ്ടായിരുന്നു. എന്നാൽ പെട്ടെന്ന് ബസ് മുന്നോട്ടെടുക്കാൻ കഴിയാത്ത സാഹചര്യമായിരുന്നു. പിന്നാലെ മുൻപോട്ടു വന്ന ഓട്ടോറിക്ഷ ബസിന് തടസമുണ്ടാക്കുന്ന രീതിയിൽ ആദ്യം ഓടിച്ചു. സെെഡ് കൊടുക്കാത്തതിന് തുടർന്ന് ബസ് ഡ്രെെവർ ഹോൺ മുഴകി. പിന്നാലെ ഓട്ടോയിൽ നിന്ന് വടിവാൾ പുറത്തേക്കിട്ട് വീശിക്കാണിച്ചു.
തലേക്കര മുതൽ കൊളത്തൂർ എയർപോർട്ട് റോഡ് ജംഗ്ഷൻ വരെ ഇത് തുടർന്നു. പിന്നാലെ ഓട്ടോ ഡ്രെെവർ എയർപോർട്ട് റോഡിലേക്ക് പോകുകയായിരുന്നു. ബസ് കൊണ്ടോട്ടിയിൽ എയ്ഡ് പോസ്റ്റിലെത്തി പൊലീസിൽ പരാതിപ്പെട്ട ശേഷമാണ് യാത്ര തുടർന്നത്', ബസ് ജീവനക്കാർ പറഞ്ഞു. ഇന്നാണ് പൊലീസിൽ വിശദമായ മൊഴി ജീവനക്കാർ നൽകിയത്. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |