സമുദായത്തിൽ നിന്ന് കൂടുതൽ പേർ സിവിൽ സർവീസിൽ വരണം: വെള്ളാപ്പള്ളി നടേശൻ

ആലപ്പുഴ: സാമൂഹ്യനീതി ലഭിക്കണമെങ്കിൽ പിന്നാക്ക സമുദായത്തിൽ നിന്ന് കൂടുതൽ പേർ സിവിൽ സർവീസിലേക്ക് കടന്നുവരണമെന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. എസ്.എൻ.ഡി.പി യോഗം അമ്പലപ്പുഴ യൂണിയനിലെ മെരിറ്റ് ഈവനിംഗും പ്രതിഭകളെ ആദരിക്കലും ഉദ്ഘാടനം ചെയ്യുകയായിരുന്നു അദ്ദേഹം. ഐ.എ.എസ്, ഐ.പി.എസ്, ഐ.ആർ.എസ് മേഖലകളിൽ സമുദായത്തിൽനിന്ന് കൂടുതൽ പേർ വരുന്നതിനുള്ള പ്രവർത്തനമാണ് ശ്രീനാരായണീയർ നടത്തേണ്ടത്. ശ്രീനാരായണ ഗുരുദേവന്റെ വിദ്യാഭ്യാസ ദർശനങ്ങൾ ഉൾക്കൊണ്ടാണ് ആർ.ശങ്കർ പ്രവർത്തിച്ചത്. ഉന്നത വിദ്യാഭ്യാസത്തിന് സമുദായ അംഗങ്ങൾക്ക് അവസരം ഒരുക്കിയത് ആർ.ശങ്കറായിരുന്നു. കൊല്ലം എസ്.എൻ കോളേജ് ഒഴികെ മറ്റെല്ലാ കോളേജുകളും ഗ്രാമീണ മേഖലയിലാണ് സ്ഥാപിച്ചത്. ശങ്കറിന് ശേഷം എത്ര ഉന്നത വിദ്യാഭ്യാസ സ്ഥാപനങ്ങൾ മാറിമാറിവന്ന സർക്കാരുകൾ നമുക്ക് നൽകി എന്ന് പരിശോധിക്കണം. എസ്.എൻ.ഡി.പി യോഗത്തിന് മാത്രമാണ് സാമൂഹ്യ, രാഷ്ട്രീയ, സാമ്പത്തിക, വിദ്യാഭ്യാസ മേഖലയിൽ നീതി ലഭിക്കാത്തത്. സംഘടിത ശക്തിയായാലേ സമുദായത്തിന് മുന്നേറാൻ കഴിയൂ. മറ്റുള്ളവരുടെ അവകാശം തട്ടിയെടുക്കാനല്ല,​ നമ്മുടെ അവകാശം നേടാനാണ് സംഘടിത ശക്തിയാകേണ്ടത്. മറ്റുള്ളവർ ജെറ്റിന്റെ വേഗതയിൽ വളരുമ്പോൾ നമ്മൾ ഒച്ചിന്റെ വേഗതയിലാണ് വളരുന്നത്. സംഘടനയെ തളർത്തുന്ന പ്രവർത്തനമാണ് സമുദായത്തിൽ നിന്ന് ചിലർ നടത്തുന്നത്. സുപ്രീംകോടതിയിൽ വരെ ചിലർ കേസുമായി പോയി. ഇത്തരം പ്രവർത്തനങ്ങളെ കരുതലോടെ നേരിട്ടാലേ സമുദായത്തിന് വളർച്ചയുണ്ടാവുകയുള്ളൂവെന്നും വെള്ളാപ്പള്ളി നടേശൻ പറഞ്ഞു.

യൂത്ത്മൂവ്മെന്റിന്റെ മെമ്പർഷിപ്പ് ക്യാമ്പെയിൻ അദ്ദേഹം ഉദ്ഘാടനം ചെയ്തു.

പ്രതിഭകളെ ആദരിക്കൽ മന്ത്രി വി.എൻ.വാസവനും പുരസ്‌കാരദാനം രമേശ് ചെന്നിത്തലയും നിർവഹിച്ചു. അവാർഡ് ദാനം എം.എൽ.എമാരായ പി.പി.ചിത്തരഞ്ജൻ, എച്ച്.സലാം, ആലപ്പുഴ നഗരസഭാദ്ധ്യക്ഷ കെ.കെ.ജയമ്മ എന്നിവർ നിർവഹിച്ചു. എൻ.കെ.നാരായണൻ സ്മാരക വിദ്യാഭ്യാസ ധനസഹായം, സ്‌കോളർഷിപ്പുകൾ എന്നിവ ഡെപ്യൂട്ടി കളക്ടർ സി.പ്രേംജി, കൊല്ലം ഗവ. മെഡിക്കൽ കോളേജ് പ്രിൻസിപ്പൽ ഡോ.ബി.പദ്മകുമാർ, ചൈതന്യമഠം ട്രസ്റ്റി ആർ. രുദ്രൻ, എസ്.ഡി.വി സ്‌കൂൾസ് മാനേജർ പ്രൊഫ.എസ്.രാമാനന്ദ് എന്നിവർ നിർവഹിച്ചു.

യൂണിയൻ പ്രസിഡന്റ് പി.ഹരിദാസ് അദ്ധ്യക്ഷത വഹിച്ചു. യൂണിയൻ സെക്രട്ടറി കെ.എൻ. പ്രേമാനന്ദൻ സ്വാഗതവും വൈസ് പ്രസിഡന്റ് ബി.രഘുനാഥ് നന്ദിയും പറഞ്ഞു.

നഗരസഭ വിദ്യാഭ്യാസ സ്ഥിരം സമിതി അദ്ധ്യക്ഷ ആർ.വിനീത, കൗൺസിലർ മനു ഉപേന്ദ്രൻ എന്നിവർ സംസാരിച്ചു.