ഗൃഹനാഥന്റെ മരണം കൊലപാതകം,​ രണ്ടുപേർ അറസ്റ്റിൽ

ആലപ്പുഴ: വീട്ടിലെ അക്വേറിയത്തിൽ ഗൃഹനാഥനെ മരിച്ചനിലയിൽ കണ്ടെത്തിയ സംഭവം കൊലപാതകമെന്ന് തെളിഞ്ഞു.​ രണ്ടുപേർ അറസ്റ്റിലായി. അലക്കുന്ന് കിഴക്കേടത്ത് വീട്ടിൽ കുഞ്ഞുമോൻ (57), ആര്യാട് സൗത്ത് പത്താം വാർഡിൽ മുരിക്കുലം വീട്ടിൽ നവാസ് (52) എന്നിവരാണ് പിടിയിലായത്. തോണ്ടൻകുളങ്ങര വാർഡ് കിളയാംപറമ്പ് വീട്ടിൽ മുഹമ്മദ് കുഞ്ഞിന്റെ മകൻ കബീറാണ് (52) കൊല്ലപ്പെട്ടത്.

പൊലീസ് പറയുന്നത്: കബീർ തനിച്ചാണ് താമസം. 5ന് വൈകുന്നേരം പ്രതികളും കബീറും ഒരുമിച്ച് മദ്യപിച്ചു. ഇതിനിടെ,​ കബീറിന്റെ ബൈക്ക് വിൽക്കാൻ അഡ്വാൻസായി വാങ്ങിയ 20​00രൂപയെ ചൊല്ലി തർക്കമായി. തുടർന്ന് കബീറിനെ ഇരുവരും ചേർന്ന് പിടിച്ചുതള്ളി. ഇടത് കക്ഷം അടിച്ച് സമീപത്തെ അക്വേറിയത്തിൽ വീണ് കബീറിന് പരിക്കേറ്റു. മുറിവിൽ നിന്ന് ചോര വാർന്നതോടെ അപകടം പറ്റിയതായി ഇരുവരും പൊലീസിൽ അറിയിച്ചു.

എന്നാൽ,​ പൊലീസ് എത്തുന്നതിന് മുമ്പ് ഇരുവരും ചേർന്ന് കബീറിനെ ജനറൽ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. അസ്വഭാവിക മരണത്തിന് കേസ്സെടുത്ത പൊലീസ്,​ പോസ്റ്റുമോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുത്തു. നാട്ടുകാരുടെ സംശയത്തെത്തുടർന്ന് കുഞ്ഞുമോനെയും നവാസിനെയും നോർത്ത് സി.ഐ എസ്.സജികുമാറിന്റെ നേതൃത്വത്തിൽ

കസ്റ്റഡിയിലെടുത്ത് ചോദ്യം ചെയ്തപ്പോഴാണ് കൊലപാതകമെന്ന് തെളിഞ്ഞത്.

ഇരുവരും കുറ്റം സമ്മതിച്ചു.