ചന്ദ്രികയുടെ ക്യാമ്പയിനിൽ നിന്ന് പിന്മാറി ജി.സുധാകരൻ

അമ്പലപ്പുഴ: മുസ്ലിം ലീഗ് മുഖപത്രമായ ചന്ദ്രികയുടെ ക്യാമ്പയിൻ ഉദ്ഘാടനത്തിൽ നിന്ന് അവസാന നിമിഷം പിന്മാറി മുൻ മന്ത്രി ജി.സുധാകരൻ. മുൻകൂട്ടി തീരുമാനിച്ച പരിപാടി ഉദ്ഘാടനം ചെയ്യാമെന്ന് തലേ ദിവസം വരെ അദ്ദേഹം പറഞ്ഞിരുന്നു. അതനുസരിച്ച്,​​ ഉദ്ഘാടന ദിവസമായ ഇന്നലെ രാവിലെ 8.30 ഓടെ മുസ്ലിം ലീഗ് ജില്ലാ പ്രസിഡന്റ് എ.എം.നസീറിന്റെ നേതൃത്വത്തിൽ പ്രവർത്തകരും ചന്ദ്രികയുടെ ജീവനക്കാരും ജി.സുധാകരന്റെ പറവൂരിലെ നവനീതം വസതിയിൽ എത്തിയിരുന്നു.

എന്നാൽ,​ അവരെ സ്വീകരിച്ച് അകത്തിരുത്തിയ ശേഷം താൻ വിവാദമുണ്ടാക്കാനില്ലെന്നും ഉദ്ഘാടനം മറ്റൊരു ദിവസം ചെയ്യാമെന്നും പറഞ്ഞ് അദ്ദേഹം അവരെ തിരിച്ചയയ്ക്കുകയായിരുന്നു. അതേസമയം,​ കഴിഞ്ഞ വർഷം ചന്ദ്രികയുടെ അമ്പലപ്പുഴ മണ്ഡലം ക്യാമ്പയിൻ ഉദ്ഘാടനം ചെയ്തത് ജി.സുധാകരനായിരുന്നുവെന്ന് മുസ്ലിം ലീഗ് ജില്ലാ പ്രസിഡന്റ് എ.എം.നസീർ പറഞ്ഞു. പൊതുകാര്യ പ്രസക്തനും , ചന്ദ്രികയുമായുള്ള പഴയ കാല ബന്ധങ്ങളും കൊണ്ടാണ് അദ്ദേഹത്തെ ഉദ്ഘാടനത്തിന് ക്ഷണിച്ചതെന്നും ,ക്യാമ്പയിൻ മറ്റൊരു ദിവസം നടത്തുമെന്നും അദ്ദേഹം പറഞ്ഞു.