ചന്ദേർകുഞ്ച് ആർമി ടവർ പൊളിക്കൽ : ആശങ്ക ഒഴിയാതെ ഫ്ലാറ്റ് ഉടമകൾ

കൊച്ചി: വൈറ്റില സിൽവർ സാൻഡ് ഐലൻഡിലെ ചന്ദേർകുഞ്ച് ആർമി ടവർ പൊളിച്ചുപണിയാനുള്ള ഉത്തരവിലെ അവ്യക്തതകളിൽ ഫ്ളാറ്റുടമകൾക്ക് ആശങ്ക. ജില്ല കളക്ടറുടെ നേതൃത്വത്തിലുള്ള കമ്മിറ്റിക്കാണ് താമസക്കാരെ ഒഴിപ്പിക്കാനും പൊളിക്കാനും പുനർനിർമ്മിക്കാനുമുള്ള ചുമതല. കമ്മിറ്റിയുടെ ഘടന, വാടക ആർക്കൊക്കെ ലഭിക്കും, പ്രൊമോട്ടർമാരായ ആർമി വെൽഫെയർ ഹൗസിംഗ് ഓർഗനൈസേഷന്റെ (എ.ഡബ്‌ള്യു.എച്ച്.ഒ) ചുമതല തുടങ്ങിയ കാര്യങ്ങളിൽ സംശയങ്ങളുണ്ടെന്ന് ഫ്ളാറ്റുടമകളുടെ സംഘടനയായ ചന്ദേർകുഞ്ച് വെൽഫെയർ ആൻഡ് മെയി​ന്റനൻസ് സൊസൈറ്റി​ ഭാരവാഹി​കൾ വാർത്താസമ്മേളനത്തി​ൽ പറഞ്ഞു.

മൂന്നു ടവറുകളും നി​ൽക്കുന്ന ഭൂമി​ ഇപ്പോഴും നി​ലമാണ്. ഇതു പുരയി​ടമാക്കി​ മാറ്റാൻ റവന്യു വകുപ്പ് 5 കോടി​ രൂപ ആവശ്യപ്പെട്ടിട്ടുണ്ട്. രണ്ട് ടവറുകൾ പുനർനി​ർമ്മിക്കാൻ 175 കോടി​ എ.ഡബ്‌ള്യു.എച്ച്.ഒ നൽകണമെന്നാണ് വ്യവസ്ഥ. ലാഭേച്ഛയി​ല്ലാതെ പ്രവർത്തി​ക്കുന്ന എ.ഡബ്‌ള്യു.എച്ച്.ഒയ്‌ക്ക് ഈ പണം എവി​ടെ നി​ന്ന് ലഭി​ക്കുമെന്ന് അറി​യി​ല്ല. മെട്രോ റെയി​ലി​ന്റെ മൂന്നു തൂണുകൾ ചന്ദേർകുഞ്ചി​ന്റെ ഭൂമി​യി​ലാണ്. കെ.എം.ആർ.എല്ലി​ൽ നി​ന്ന് ഒരു പൈസ പോലും ലഭി​ച്ചി​ട്ടി​ല്ല. കറക്കുകമ്പനി​ പോലെയാണ് എ.ഡബ്‌ള്യു.എച്ച്.ഒയുടെ പ്രവർത്തനമെന്നും ഭാരവാഹി​കൾ ആരോപി​ച്ചു.

40ഓളം ഉമടകൾക്കു മാത്രമേ ഹൈക്കോടതി​ ഉത്തരവുപ്രകാരം മാറി​ താമസി​ക്കാൻ വാടക ലഭി​ക്കൂ. കെട്ടി​ടങ്ങൾ പൊളി​ക്കുമ്പോൾ സമീപത്തുള്ള എ ടവറി​ന്റെ സുരക്ഷി​തത്വം ഉറപ്പാക്കണം. പുനർനി​ർമ്മി​ക്കുമ്പോൾ കൂടുതൽ നി​ലകളും ഫ്ളാറ്റുകളും ആകാമെന്ന് ഉത്തരവി​ലുണ്ട്. ഭൂമി​യുടെ ഉടമസ്ഥത നി​ലവി​ലെ ഉടമകളുടേതാണ്. ഇതിനെക്കുറി​ച്ചൊന്നും ഹൈക്കോടതി​ ഉത്തരവി​ൽ സൂചനയി​ല്ല. വീണ്ടും ഹൈക്കോടതി​യെ സമീപിക്കാൻ ആലോചി​ക്കുകയാണെന്നും അവർ പറഞ്ഞു.

സൊസൈറ്റി​ ജോയി​ന്റ് സെക്രട്ടറി​ സജി​ തോമസ്, ലെഫ്. കമാൻഡർ (റി​ട്ട.) വി​.വി​.കൃഷ്ണൻ, വിംഗ് കമാൻഡർ (റി​ട്ട.) ജോർജ് ആന്റണി​, ആനി​ ജോൺ​, ലെഫ്. കേണൽ (റി​ട്ട.) സ്മി​താ റാണി​ എന്നി​വരും വാർത്താസമ്മേളനത്തി​ൽ പങ്കെടുത്തു.