മാരാമൺ കൺവെൻഷന് ഇന്ന് തുടക്കം

പത്തനംതിട്ട : 130ാമത് മാരാമൺ കൺവെൻഷന് പമ്പാ മാരാമൺ​ മണൽപ്പുറത്തെ പ്രത്യേകം തയ്യാറാക്കി​യ പന്തലി​ൽ ഇന്ന് തുടക്കമാകും. ഉച്ചയ്ക്ക് ശേഷം 2.30ന് ഡോ. തിയഡോഷ്യസ് മാർത്തോമ്മാ മെത്രാപ്പൊലീത്ത ഉദ്ഘാടനം നി​ർവഹി​ക്കും. സുവിശേഷ പ്രസംഗ സംഘം പ്രസിഡന്റ് ഡോ.ഐസക് മാർ പീലക്സിനോസ് അദ്ധ്യക്ഷനായി​രി​ക്കും. സഭകളുടെ ലോക കൗൺസിൽ ജനറൽ സെക്രട്ടറി റവ.ഡോ. ജെറി പിള്ളൈ (സ്വിറ്റ്സർലൻഡ്), കൊളംബിയ തിയളോജിക്കൽ സെമിനാരി പ്രസിഡന്റ് റവ.ഡോ.വിക്ടർ അലോയോ, ഡോ.രാജ്കുമാർ രാംചന്ദ്രൻ (ഡൽഹി) എന്നിവരാണ് മുഖ്യപ്രസംഗകർ. സമാപന ദിവസമായ 16 ന് രാവി​ലെ 7.30ന് മാരാമൺ, ചിറയിറമ്പ്, കോഴഞ്ചേരി പള്ളികളിൽ കുർബാനയ്ക്ക് ബിഷപ്പുമാർ നേതൃത്വം നൽകും. 2.30 ന് സമാപന സമ്മേളനത്തിൽ ഡോ.തിയഡോഷ്യസ് മാർത്തോമ്മാ മെത്രാപ്പൊലീത്ത സന്ദേശം നൽകും.