മീൻ വാങ്ങാൻ പോകുന്നവർ ശ്രദ്ധിക്കുക, സ്ഥിതി നിലവിൽ അനുയോജ്യമല്ല, ​ ഡിമാൻഡ് ഇപ്പോൾ മറ്റൊന്നിന്

 മത്തി 100 -120 രൂപ

 അയല 200 - 240 രൂപ

 ചെമ്മീൻ 400 -450 രൂപ

 ആവോലി 600 -700 രൂപ

 മാന്തൾ 200 -250 രൂപ

പാലക്കാട്: അനുദിനം ഉയരുന്ന താപനില കടലിനെയും ചുട്ടുപൊള്ളിക്കുന്നതിനാൽ കടൽ മത്സ്യങ്ങളുടെ ലഭ്യത കുറയുന്നു. ഇതോടെ ജില്ലയിൽ മത്തി, അയല, ചെമ്മീൻ തുടങ്ങിയവയ്ക്ക് വിലയും ഉയർന്നു. കടൽ മത്സ്യങ്ങളുടെ വരവ് കുറഞ്ഞതായി കച്ചവടക്കാർ പറയുന്നു. പ്രതിദിനം 700-800 പെട്ടി മീൻ എത്തിയിരുന്ന പാലക്കാട്ടെ മത്സ്യ മാർക്കറ്റിൽ ഇപ്പോൾ എത്തുന്നത് അതിന്റെ പകുതി മാത്രം. കഴിഞ്ഞയാഴ്ചവരെ 80 രൂപയുണ്ടായിരുന്ന മത്തിക്ക് നിലവിൽ 100-120 രൂപ നൽകണം. നേരത്തെ വലിയ മത്തി ധാരാളം വന്നിരുന്നെങ്കിലും ഇപ്പോൾ കുഞ്ഞൻ മത്തിയാണ് ലഭിക്കുന്നത്. 120 രൂപയുണ്ടായിരുന്ന അയലയ്ക്ക് ഇപ്പോൾ 200-240 രൂപയുണ്ട് വില. ചെമ്മീന് 400-450 രൂപയും ആവോലിക്ക് 600-700 രൂപയും വലിയ മാന്തളിന് 200-250 രൂപയും വിലയുണ്ട്. കേര, നെയ്മീൻ എന്നിവയ്ക്ക് കിലോയ്ക്ക് 550-600 രൂപ വരെയുണ്ട്. മത്സ്യമാർക്കറ്റുകളിൽ വില അല്പം കുറവാണെങ്കിലും വീടുകളിലെത്തി വില്പന നടത്തുന്നവരിലും സ്റ്റാളുകളിലും വില കൂടുതലാണ്. പൊന്നാനി, കോഴിക്കോട്, ചാവക്കാട് എന്നിവിടങ്ങളിൽ നിന്നും അയൽ സംസ്ഥാനങ്ങളിൽ നിന്നുമാണ് പാലക്കാട്ടെ മത്സ്യമാർക്കറ്റുകളിലേക്ക് മീനുകളെത്തുന്നത്. പാലക്കാട് മാർക്കറ്റ് റോഡിലും കൊടുവായൂരിലുമാണ് പ്രധാന മാർക്കറ്റുകൾ.

 പുഴ, ഡാം മീനുകൾക്ക് ആവശ്യക്കാരേറെ

കടൽമീനിന്റെ വരവു കുറഞ്ഞതോടെ അണക്കെട്ടുകളിൽ നിന്നുമുള്ള മീനുകൾക്ക് ആവശ്യക്കാരേറിയുണ്ട്. മലമ്പുഴ അണക്കെട്ടിലെ മീനുകൾ ഫിഷറീസ് വകുപ്പിന്റെ സ്റ്റാളുകൾ വഴിയാണ് വിൽപ്പന നടത്തുന്നത്. ഇതിനുപുറമേ പുഴ മീനുകൾക്കും ഡിമാൻഡുണ്ട്. ഡാം വാള, സിലോപ്പിയ എന്നിവയ്ക്കും ആവശ്യക്കാരെയാണ്.