നമ്പർ പ്ലേറ്റ് നിർമിക്കുന്ന മെഷീനിൽ യുവതിയുടെ വിരൽ കുടുങ്ങി; രക്ഷകരായി ഫയർഫോഴ്‌സ്

തിരുവനന്തപുരം: നമ്പർ പ്ലേറ്റ് തയ്യാറാക്കുന്നതിനിടെ സ്വകാര്യ സ്ഥാപനത്തിലെ ജീവനക്കാരിയുടെ വിരൽ മെഷീനിൽ കുടുങ്ങി. ഇന്നലെ വൈകിട്ടായിരുന്നു സംഭവം. തൈക്കാട് ജംഗ്‌ഷനിൽ പ്രവർത്തിക്കുന്ന നമ്പർപ്ലേറ്റ് ഡിസൈനിംഗ് സ്ഥാപനത്തിലെ ജീവനക്കാരിയായ അനീഷ (24)യുടെ വിരലാണ് ഡിസൈനിംഗ് മെഷീനിൽ കുടുങ്ങിയത്.

വലതുകൈ വിരൽ മെഷീനിൽ കുടുങ്ങി പുറത്തെടുക്കാനാകാതായതോടെ ഫയർഫോഴ്‌സിനെ വിവരമറിയിക്കുകയായിരുന്നു. തിരുവനന്തപുരം നിലയത്തിൽ നിന്ന് ഗ്രേഡ് എഎസ്‌ടിഒ ഉല്ലാസിന്റെ നേതൃത്വത്തിൽ സജികുമാർ, ഷഹീർ, ഹരിലാൽ, മനു, സനു, ശ്രീജിത്ത്, പ്രശാന്ത്, ബൈജു എന്നിവരെത്തി ഹൈഡ്രോളിക് കട്ടർ, ആംഗിൾ കട്ടർ എന്നിവ ഉപയോഗിച്ച് അര മണിക്കൂർ പരിശ്രമിച്ചാണ് വിരൽ പുറത്തെടുത്തത്.

വിരലിന് ചതവും നീരും ഉണ്ടായതോടെ അനീഷയെ ഫയർഫോഴ്‌സ് ആംബുലൻസിൽ തിരുവനന്തപുരം ജനറൽ ആശുപത്രിയിൽ പ്രവേശിപ്പിച്ചു. ചികിത്സയ്‌ക്ക് ശേഷം അനീഷ സുഖം പ്രാപിച്ചുവരുന്നുവെന്നാണ് ഒപ്പം ജോലി ചെയ്യുന്നവർ പറയുന്നത്.