ഇവരുടെ കറണ്ടു ബിൽ കുത്തനെ കുറയും,​ വൈദ്യുതി നിരക്കിൽ ഇളവ് പ്രഖ്യാപിച്ചു,​ ചെയ്യേണ്ടത് ഇത്രമാത്രം

തിരുവനന്തപുരം: കെ.എസ്.ഇ.ബി ഭിന്നശേഷിക്കാർക്കും ക്യാൻസർ രോഗികൾക്കും വൈദ്യുതി നിരക്കിൽ ഇളവ് പ്രഖ്യാപിച്ചു. കേരള സ്റ്റേറ്റ് ഇലക്ട്രിസിറ്റി റെഗുലേറ്ററി കമ്മീഷന്റെ താരിഫ് ഉത്തരവ് പ്രകാരമാണ് ഭിന്നശേഷിക്കാരും ക്യാൻസർ രോഗികളും താമസിക്കുന്ന വീടുകൾക്ക് താരീഫിൽ പ്രത്യേക ഇളവ് പ്രഖ്യാപിച്ചത്. 2024 ഡിസബംർ അഞ്ച് മുതൽ 2027 മാർച്ച് 31 വരെ ഇളവ് ബാധകമാകും.

1. ഇളവ് എങ്ങനെ?

ഭിന്നശേഷിക്കാരോ ക്യാൻസർ രോഗികളോ താമസിക്കുന്ന വീടുകളിലെ പ്രതിമാസ ഉപഭോഗത്തിലെ ആദ്യ 100 യൂണിറ്റ് ഉപഭോഗം വരെ പ്രതി യൂണിറ്റിന് 1.50 രൂപ എന്ന കുറഞ്ഞ നിരക്കാണ് താരീഫ് ഉത്തരവ് പ്രകാരം നൽകേണ്ടിവരുക.

100 യൂണിറ്റിന് മുകളിൽ വരുന്ന ഉപഭോഗത്തിന് താരിഫ് സ്ലാബ് പ്രകാരമുള്ള നിരക്ക് ബാധകമാവും.

ഉദാ: പ്രതിമാസ ഉപഭോഗം = 135 യൂണിറ്റ്

ആദ്യ 100 യൂണിറ്റ് = 100 x 1.5 രൂപ ( സബ്സിഡൈസ്ഡ് താരിഫ്) = 150 രൂപ

ബാക്കി 35 യൂണിറ്റ് = 35 x 5.35 ( 100 ന് മുകളിൽ 150 വരെയുള്ള താരിഫ്) = 187.25 രൂപ

ആകെ = 150 + 187.25 = 337.25 രൂപ

2. ആർക്കെല്ലാം ലഭ്യമാവും ?

40 ശതമാനമോ അതിലധികമോ സ്ഥിരമായ ഭിന്നശേഷിയുള്ളവരോ ( Permaent Disability of & above 40%) ക്യാൻസർ രോഗികളോ താമസിക്കുന്ന 2000 വാട്ടോ അതിൽ താഴെയോ കണക്റ്റഡ് ലോഡുമുള്ള ദാരിദ്ര്യ രേഖയ്ക്ക് താഴെയുള്ള (BPL) കുടുംബങ്ങൾക്ക് ഈ ഇളവ് ലഭ്യമാവും.

3. ഓഫീസിൽ സമർപ്പിക്കേണ്ട രേഖകൾ ?

A. ഉപഭോക്താവിന്റെ അപേക്ഷ

B. ഭിന്നശേഷിയുള്ള / ക്യാൻസർ രോഗിയായ വ്യക്തി, ഉപഭോക്താവിന്റെ കൂടെ താമസ്സിക്കുന്നയാളാണെന്ന് തെളിയിക്കാനുള്ള രേഖ.

ഇതിനായി റേഷൻ കാർഡിന്റെ കോപ്പിയോ, വില്ലേജ് ഓഫീസറുടെ സർട്ടിഫിക്കറ്റോ ഉപയോഗിക്കാം.

C. ഭിന്നശേഷിയുള്ള / ക്യാൻസർ രോഗിയായ വ്യക്തിയുടെ പേരിലാണ് വൈദ്യുതി കണക്ഷനെങ്കിൽ "B" പ്രകാരമുള്ള രേഖ ആവശ്യമില്ല.

D. ഭിന്നശേഷിക്കാരനെങ്കിൽ 40 ശതമാനമോ അതിലധികമാ സ്ഥിര ഭിന്നശേഷിയുണ്ടെന്ന് (Permaent Disability) തെളിയിക്കുന്ന മെഡിക്കൽ ബോർഡിന്റെ സർട്ടിഫിക്കറ്റ്. ക്യാൻസർ രോഗിയെങ്കിൽ ഗവൺമെന്റ് മെഡിക്കൽ പ്രാക്റ്റീഷ്യനറുടെ മെഡിക്കൽ സർട്ടിഫിക്കറ്റ് അല്ലെങ്കിൽ പ്രമുഖ ക്യാൻസർ ട്രീറ്റ്മെന്റ് സ്ഥാപനങ്ങളിൽ നിന്നുള്ള സർട്ടിഫിക്കറ്റ്.

E. തദ്ദേശ സ്വയംഭരണ സ്ഥാപനങ്ങളിൽ നിന്ന് ലഭിക്കുന്ന BPL സർട്ടിഫിക്കറ്റ് അല്ലെങ്കിൽ വാർഷിക വരുമാനം 50,000 രൂപയിൽ താഴെ എന്ന് തെളിയിക്കുന്ന വരുമാന സർട്ടിഫിക്കറ്റ്.

4. വിതരണ ഓഫീസുകൾ ചെയ്യേണ്ടത്.

മേൽപ്പറഞ്ഞ രേഖകളോടൊപ്പമുള്ള അപേക്ഷകൾ പരിശോധിച്ച് ഫീൽഡ് ഇൻസ്പെക്ഷൻ നടത്തി ഉപഭോക്താവിന്റെ കണക്റ്റഡ് ലോഡ് 2 കിലോ വാട്ടിന് മുകളിലല്ല എന്ന് ഉറപ്പാക്കണം. ആയതിന ശേഷം ബില്ലിംഗ് സോഫ്റ്റ‌വെയറിൽ സെക്ഷൻ ഇനിഷ്യേറ്റഡായി ഉപഭോക്താവിന്റെ പർപ്പസ് Domestic Cancer / Disabled ആക്കി മാറ്റണം. തുടർന്ന് വരുന്ന ബില്ലുകളിൽ ഉപഭോക്താവിന് ഇളവ് ലഭിച്ചു തുടങ്ങും.