ജീവൻ നിലനിർത്തുന്നത് വെന്റിലേറ്ററിന്റെ സഹായത്തോടെ,​ വിഎസിന്റെ ആരോഗ്യനില മാറ്റമില്ലാതെ തുടരുന്നുവെന്ന് മെഡിക്കൽ ബുളളറ്റിൻ

തിരുവനന്തപുരം: മുൻ മുഖ്യമന്ത്രിയും മുതിർന്ന സിപിഎം നേതാവുമായ വി എസ് അച്യുതാനന്ദന്റെ ആരോഗ്യനില മാ​റ്റമില്ലാതെ തുടരുന്നുവെന്ന് മെഡിക്കൽ ബുളള​റ്റിൻ. പട്ടം എസ് യു ടി ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിൽ കഴിയുന്ന വി എസിന്റെ ആരോഗ്യനിലയെക്കുറിച്ച് ഇന്ന് ഉച്ചയ്ക്ക് ഒന്നരയ്ക്ക് പുറത്തിറക്കിയ ബുളള​റ്റിനിലാണുളളത്. വെന്റിലേ​റ്ററിന്റെ സഹായത്തോടെ ജീവൻ നിലനിർത്തുന്ന അദ്ദേഹത്തെ ഡയാലിസിസ് ചികിത്സയ്ക്കും വിധേയമാക്കുന്നുണ്ടെന്നാണ് വിവരം.

ഹൃദയാഘാതത്തെത്തുടർന്ന് ജൂൺ 23നാണ് വി എസ് അച്യുതാനന്ദനെ ആശുപത്രിയിൽ പ്രവേശിപ്പിച്ചത്. അന്നുമുതൽ തീവ്രപരിചരണ വിഭാഗത്തിൽ ചികിത്സയിൽ കഴിയുകയാണ് അദ്ദേഹം. മുഖ്യമന്ത്രി പിണറായി വിജയനും സിപിഎം സംസ്ഥാന സെക്രട്ടറി എം വി ഗോവിന്ദൻ,​ പ്രതിപക്ഷനേതാവ് വി ഡി സതീശൻ എന്നിവരടക്കമുളള നേതാക്കൾ ആശുപത്രിയിലെത്തി വി എസിന്റെ ആരോഗ്യനിലയെക്കുറിച്ച് അന്വേഷിച്ചിരുന്നു.