ഗവർണറുടെ അധികാരം പാഠ്യഭാഗം: 'അദ്ധ്യായം 8-ജനാധിപത്യം ഒരു ഇന്ത്യൻ അനുഭവം' # അടിയന്തരാവസ്ഥയും ഉൾപ്പെടുത്തി

തിരുവനന്തപുരം: ഗവർണറുടെ അധികാരങ്ങൾ പ്രതിപാദിക്കുന്ന പത്താം ക്ലാസ്സിലെ സാമൂഹ്യശാസ്ത്രം ഉൾപ്പെടെയുള്ള പാഠപുസ്തകങ്ങൾക്ക് കരിക്കുലം കമ്മിറ്റിയുടെ അംഗീകാരം.

രണ്ട്, നാല്, ആറ്, എട്ട്, പത്ത് ക്ലാസ്സുകളിലെ രണ്ടാംഭാഗം 95 ടൈറ്റിൽ പാഠപുസ്തകങ്ങൾക്കാണ് വിദ്യാഭ്യാസമന്ത്രിയുടെ അദ്ധ്യക്ഷതയിൽ ചേർന്ന അമ്പത്തിയെട്ടാം കരിക്കുലം കമ്മിറ്റിയോഗം അംഗീകാരം നൽകിയത്.
പത്താംക്ലാസ്സിലെ സാമൂഹ്യശാസ്ത്രം രണ്ടാം വാല്യം പാഠപുസ്തകത്തിലെ 'ജനാധിപത്യം ഒരു ഇന്ത്യൻ അനുഭവം' എന്ന എട്ടാം അദ്ധ്യായത്തിലാണ് ഗവർണറുടെ അധികാരങ്ങളും ചുമതലകളും പ്രതിപാദിക്കുന്നത്. ഗവർണറുടെ പങ്ക് എന്ന ഭാഗത്ത് സർക്കാരിയ കമ്മിഷൻ റിപ്പോർട്ട്, ഗവർണറുടെ നീതിന്യായ അധികാരം, വിവേചനാധികാരം തുടങ്ങിയവയും വിശദീകരിക്കുന്നുണ്ട്.

അടിയന്തരാവസ്ഥ: ഇന്ത്യൻ ജനാധിപത്യത്തിലെ പ്രതിസന്ധിഘട്ടം, ഇലക്ടറർ ബോണ്ട് റദ്ദാക്കിയ സുപ്രീംകോടതി വിധി, റിസോർട്ട് പൊളിറ്റിക്സ് എന്നിവ സംബന്ധിച്ചും ഈ അദ്ധ്യായത്തിൽ വിശദീകരിക്കുന്നു.

പാഠപുസ്തകങ്ങൾ ഓണാവധിക്കു മുമ്പുതന്നെ കുട്ടികൾക്ക് ലഭ്യമാക്കും.
ഹയർ സെക്കൻഡറി പാഠപുസ്തക പരിഷ്‌കരണവുമായി ബന്ധപ്പെട്ട് ഹയർ സെക്കൻഡറി ക്ലാസ്സ് മുറികളിൽ വിശദമായ ചർച്ച സംഘടിപ്പിച്ച് വിദ്യാർത്ഥികളുടെയും അദ്ധ്യാപകരുടേയും രക്ഷിതാക്കളുടേയും അഭിപ്രായം ശേഖരിക്കാനും ജില്ലാ സംസ്ഥാനതലങ്ങളിൽ ശിൽപശാലകൾ നടത്തി പാഠപുസ്തക രചന ആരംഭിക്കാനും കരിക്കുലം കമ്മിറ്റി അനുമതി നൽകി. ദേശീയ പഠനനേട്ട സർവേയിൽ സംസ്ഥാനത്തിന് മികച്ച നേട്ടം കൈവരിക്കാൻ പങ്കുവഹിച്ച കുട്ടികളെയും അദ്ധ്യാപകരേയും രക്ഷിതാക്കളേയും കരിക്കുലം കമ്മിറ്റി അഭിനന്ദിച്ചു.