കാറ്റിൽ വൻമരം വീണ് വീടിന്റെ മേൽക്കൂര തകർന്നു

രാജാക്കാട്: മുല്ലക്കാനത്ത് കഴിഞ്ഞ ദിവസം രാത്രിയുണ്ടായ ശക്തമായ കാറ്റിൽ വലിയ വേങ്ങ മരം കടപുഴകി വീണ് വീടിന്റെ മേൽക്കൂര തകർന്നു. മുകളേൽ ബെറ്റി സാബുവിന്റെ വീടാണ് തകർന്നത്.ഭർത്താവ് മരണപ്പെട്ട ബെറ്റിയും വിദ്യാർത്ഥിനികളായ 2 പെൺമക്കളുമാണ് വീട്ടിൽ താമസിക്കുന്നത്.വ്യാഴാഴ്ച രാത്രി 12 ന് ഉണ്ടായ കനത്ത കാറ്റിലാണ് സമീപവാസിയുടെ പുരയിട ത്തിൽ ഏകദേശം 30 മീറ്റർ അകലത്തിൽ നിന്നിരുന്ന 100 ഇഞ്ച് വലുപ്പമുള്ള വേങ്ങമരം കടപുഴകി വീണത്.മരം വീണപ്പോൾ സമീപത്തുള്ള പ്ലാവും,സിൽവർ ഓക്ക് മരങ്ങളും ഒടിഞ്ഞു വീണു.2 കിടപ്പുമുറികളുടേയും, ബാത്ത്രൂമിന്റെയും മേൽക്കൂരയിലെ ഷീറ്റുകൾ തകർന്നു വീണു.സമീപത്തെ പ്ലാവ് വീഴുമെന്ന് ഭയന്ന് മൂന്നു പേരും മറ്റൊരു മുറിയിൽ കിടന്നതിനാൽ ആളപായം ഉണ്ടായില്ല.മുറ്റത്തെ മഴ വെള്ളസംഭരണിക്കും കേടുപാടുകൾ സംഭവിച്ചിട്ടുണ്ട്. പഞ്ചായത്ത് മെമ്പറും,വില്ലേജധികാരികളും,പൊതുപ്രവർത്തകരും വീട്ടിലെത്തി മരങ്ങൾ മുറിച്ചു മാറ്റി ഷീറ്റ് വാങ്ങി ഇടുന്നതിനാവശ്യമായ നടപടികൾ സ്വീകരിച്ചു.
രാജാക്കാട് അടിവാരം റോഡിൽ തേജസ് ഏലം ഡ്രയറിന് സമീപം തെങ്ങ് ഒടിഞ്ഞ് റോഡിലേക്ക് വീണ് 11 കെ.വി ലൈനുകൾ പൊട്ടുകയും,പോസ്റ്റ് ഒടിയുകയും ചെയ്തതുമൂലം ഏറെ നേരം ഗതാഗതം തടസ
പ്പെട്ടു.പുലർച്ചെ കെ എസ് ഇ ബി ഉദ്യോഗസ്ഥർ എത്തി തെങ്ങ് മുറിച്ചുമാറ്റി ഗതാഗതം പുനസ്ഥാപിച്ചു. ഉച്ചയോടുകൂടിയാണ് വൈദ്യുതി ബന്ധം പുനസ്ഥാപിച്ചത്.മേഖലയിൽ പല സ്ഥലത്തും കനത്ത കാറ്റിൽ മരങ്ങളും,ചില്ലകളും ഒടിഞ്ഞു വീണിട്ടുണ്ട്