വിദ്യാർത്ഥികളുടെ ഹൃദയത്തിൽ ജീവിച്ച അദ്ധ്യാപകൻ; പ്രൊഫ. എംകെ സാനു അന്തരിച്ചു

കൊച്ചി: എഴുത്തുകാരനും ചിന്തകനുമായ പ്രൊഫ. എം കെ സാനു (98) അന്തരിച്ചു. കൊച്ചിയിലെ സ്വകാര്യ ആശുപത്രിയിൽ വൈകിട്ട് അഞ്ചരയോടെയായിരുന്നു അന്ത്യം. വീണ് പരിക്കേറ്റതിനെത്തുടർന്ന് കഴിഞ്ഞ ഒരാഴ്ചയായി ആശുപത്രിയിൽ ചികിത്സയിലായിരുന്നു. ന്യുമോണിയയും ബാധിച്ചു.

1928 ഒക്ടോബർ 27ന് ആലപ്പുഴയിലെ തുമ്പോളിയിൽ ജനിച്ചു. നാലു വർഷത്തോളം സ്‌കൂൾ അദ്ധ്യാപകനായി സേവനമനുഷ്ഠിച്ചു. പിന്നീട് ഗവണ്മെന്റ് കോളേജുകളിൽ അദ്ധ്യാപകനായി. 1958ൽ ആദ്യഗ്രന്ഥമായ 'അഞ്ചു ശാസ്ത്ര നായകന്മാർ' പ്രസിദ്ധീകരിച്ചു. 1960ൽ വിമർശനഗ്രന്ഥമായ കാറ്റും വെളിച്ചവും പുറത്തിറക്കി. 1983ൽ ജോലിയിൽ നിന്ന് വിരമിച്ചു.

1986ൽ പുരോഗമന സാഹിത്യസംഘം പ്രസിഡന്റായി. 1987ൽ എറണാകുളം നിയമസഭാമണ്ഡലത്തിൽ നിന്നും ഇടതുപക്ഷ സ്വതന്ത്രസ്ഥാനാർത്ഥിയായി മത്സരിച്ച് വിജയിച്ചു. ബാലസാഹിത്യം, വിമർശനം, വ്യാഖ്യാനം, ജീവചരിത്രം തുടങ്ങി വിവിധ നാല്പതോളം കൃതികളുടെ കർത്താവാണ് എം.കെ. സാനു. ആത്മകഥ: കർമഗതി.