അത് കണ്ട് എന്റെ നിയന്ത്രണം വിട്ടുപോയി,​ കലാഭവൻ നവാസിന്റെ മരണത്തിന് പിന്നാലെയുണ്ടായ അനുഭവം പങ്കുവച്ച് ടിനി ടോം

ആഗസ്റ്റ് ഒന്നിന് സിനിമാ ലോകത്തെയും ആരാധകരെയും ഒന്നടങ്കം ഞെട്ടിച്ചാണ് നടൻ കലാഭവൻ നവാസിന്റെ വിയോഗ വാർത്ത എത്തിയത്. ചോറ്റാനിക്കരയിലെ ഹോട്ടൽ മുറിയിലാണ് നവാസിനെ മരിച്ച നിലയിൽ കണ്ടെത്തിയത്. ഏറ്റവും പുതിയ ചിത്രമായ പ്രകമ്പനത്തിന്റെ അവസാന ഷെഡ്യൂളും പൂർത്തിയാക്കി റൂമിലേക്ക് മടങ്ങിവന്നതായിരുന്നു നവാസ്. ഏറെ നേരം കഴിഞ്ഞിട്ടും കാണാത്തതിനാൽ റൂംബോയ് വന്നു നോക്കുമ്പോഴാണ് നവാസിനെ നിലത്ത് വീണുകിടക്കുന്ന നിലയിൽ കണ്ടത്. കലാഭവൻ നവാസിനെ കുറിച്ച് വികാരഭരിതമായ കുറിപ്പ് പങ്കുവച്ചിരിക്കുകയാണ് സുഹൃത്തും നടനുമായ ടിനി ടോം .

തിരുവനന്തപുരത്ത് നടക്കുന്ന സിനിമ കോൺക്ലേവിൽ നിന്ന് ആലുവയിലേക്ക് എത്തുമ്പോഴേക്കും പ്രിയ സുഹൃത്തിന്റെ ഖബറടക്കം കഴിഞ്ഞുവെന്ന് ടിനി ടോം ഫേസ്ബുക്കിൽ കുറിച്ചു. കലാഭവൻ ഷാജോണിന്റെ വിഡിയോ കോളിലൂടെയാണ് നവാസിനെ അവസാനമായി ഒരു നോക്ക് കാണാൻ കഴിഞ്ഞതെന്നും ടിനി ടോം വെളിപ്പെടുത്തി. ചടങ്ങുകൾക്കു ശേഷം കലാഭവൻ നവാസിന്റെ വീട്ടിലെത്തിയപ്പോൾ കണ്ട നെഞ്ചുലയ്ക്കുന്ന കാഴ്ചയും ടിനി ടോം പങ്കുവച്ചു. നവാസിന്റെ മകൻ നവാസ് ഉപയോഗിച്ച ഷൂസുകൾ തുടച്ചു ഭംഗിയാക്കി വച്ചിരിക്കുന്നതു കണ്ടപ്പോൾ നിയന്ത്രണം വിട്ടു പോയെന്നും ടിനി ടോം കുറിച്ചു

ടിനി ടോമിന്റെ ഫേസ്ബുക്ക് പോസ്റ്റ്

ഇനി ഈ പാദുകങ്ങൾക്ക് വിശ്രമം ....കലാഭവൻ നവാസിനെ കുറിച്ച് എല്ലാവരും വാക്കുകൾ കുറിക്കുന്ന കൂട്ടത്തിൽ ഞാനും എന്റെ സഹോദരന് വേണ്ടി ഒന്ന് കുറിച്ചോട്ടെ ...തിരുവനന്തു പുരത്തു aug 2,3 മായി നടക്കുന്ന കേരള സർക്കാരിന്റെ സിനിമ കോൺക്ലേവിൽ മന്ത്രി സജി ചെറിയാൻ സാറിൽ നിന്നും അവധി മേടിച്ചാണ് നവാസിനെ കാണാൻ ആലുവയ്ക്കു തിരിച്ചത് ,എത്തിയപ്പോഴേയ്ക്കും എല്ലാം കഴിഞ്ഞിരുന്നു. കലാഭവൻ ഷാജോൺ വീഡിയോ കാളിലൂടെ അവസാനമായി എനിക്ക് നവാസിനെ കാണിച്ചു തന്നു ,എന്റെ കൂടെ കൈതപ്രം തിരുമേനിയും ,സ്നേഹയും ഉണ്ടായിരിന്നു ...ഞാൻ വിട ചൊല്ലി ...ഇന്ന് കുടുംബ സമേതം നവാസിന്റെ വീട്ടില് ചെന്നപ്പോൾ കണ്ടത് നവാസിന്റെ മകൻ ,നവാസ് ഉപയോഗിച്ച പാദുകങ്ങൾ തുടച്ചിങ്ങനെ മുന്നിൽ വച്ചിരിക്കുന്നതാണ് ,അവിടെ എന്റെ നിയന്ത്രണം വിട്ട് പോയി ,ഇനി ഇത് ധരിച്ചു സ്വദേശത്തും വിദേശത്തും ഒരുമിച്ചു യാത്രകൾ പോകാൻ നീയില്ലല്ലോ ...അതെ ആദ്യം നമ്മൾ തൊട്ട് മുത്തേണ്ടത് ഒരു ജീവിത കാലം മുഴുവൻ നമ്മളെ കൊണ്ടുനടന്ന നമ്മുടെ കാലുകളെ തന്നെയാണ് ...സഹോദര വിട ...മറ്റൊരു തീരത്തു ചിരിക്കാനും ചിരിപ്പിക്കാനും മാത്രംഅറിയാവുന്ന നമുക്ക് ഒത്തുകൂടാം ...