ചന്ദ്രൻ കട്ടച്ചോരയുടെ നിറത്തിലാകും; ഇന്ത്യയിലെ പ്രമുഖ നഗരത്തിൽ ദൃശ്യമാകും, ദിവസം അടുത്തെത്തിയെന്ന് ഗവേഷകർ

കോടാനുകോടി നിഗൂഢ രഹസ്യങ്ങളാണ് പ്രപഞ്ചത്തിലുളളത്. വാനനിരീക്ഷകരും ശാസ്ത്രജ്ഞരും മാസങ്ങളോളവും വർഷങ്ങളോളവും ഗവേഷണം നടത്തിയാണ് പ്രപഞ്ച രഹസ്യങ്ങൾ പുറത്തുകൊണ്ടുവരുന്നത്. ഇപ്പോഴിതാ സെപ്തംബർ ഏഴിന് ചന്ദ്രനിൽ സംഭവിക്കാൻ പോകുന്ന ചില കാര്യങ്ങളാണ് ശാസ്ത്രലോകത്തിൽ ചർച്ചയായിരിക്കുന്നത്. അന്ന് നടക്കുന്ന പൂർണ ഗ്രഹണത്തിൽ ചന്ദ്രന്റെ നിറം കടുംചുവപ്പാകുമെന്നാണ് കണ്ടെത്തിയിരിക്കുന്നത്. ഈ പ്രതിഭാസത്തെ 'ബ്ലഡ് മൂൺ' എന്നാണറിയപ്പെടുന്നത്. ഇതിനുപിന്നിലെ കാരണം പരിശോധിക്കാം.

അടുത്ത മാസം ലോകം പൂർണ ചന്ദ്രഗ്രഹണത്തിന് സാക്ഷ്യം വഹിക്കും. ആ സമയത്ത് ചന്ദ്രനിൽ ഒരു പ്രത്യേക ചുവന്ന തിളക്കം കാണാൻ സാധിക്കും. ഏഷ്യയിലും പടിഞ്ഞാറൻ ഓസ്‌ട്രേലിയയിലും ഉടനീളമുളള ചന്ദ്രഗ്രഹണ സമയത്ത് ചന്ദ്രൻ ഈ നിറത്തിൽ തന്നെ തുടരും. അതേസമയം, മ​റ്റുപല രാജ്യങ്ങളിലുളളവർക്ക് ബ്ലഡ് മൂണിനെ വ്യത്യസ്ത ഘട്ടങ്ങളിലായിരിക്കും കാണാൻ സാധിക്കുക. സ്‌പേസ് റിപ്പോർട്ടനുസരിച്ച്, ഏഷ്യയിലെയും പടിഞ്ഞാറൻ ഓസ്‌ട്രേലിയയുടെ ചില ഭാഗങ്ങളിലെയും ആകാശ നിരീക്ഷകർക്ക് അടുത്ത മാസം ഏഴിന് തുടക്കം മുതൽ അവസാനം വരെ പൂർണ ചന്ദ്രഗ്രഹണം അനുഭവപ്പെടും.

ഇന്ത്യ, ചൈന, റഷ്യ, പടിഞ്ഞാറൻ ഓസ്‌ട്രേലിയ, കിഴക്കൻ ആഫ്രിക്ക, അറബ് രാജ്യങ്ങൾ എന്നീ രാജ്യങ്ങളിലുളളവർക്ക് അന്നേ ദിവസം പൂർണ ചന്ദ്രഗ്രഹണം കാണാൻ കഴിയും. എന്നാൽ വടക്കേ അമേരിക്കയിൽ ഗ്രഹണം ദൃശ്യമാകില്ല. അലാസ്‌കയുടെ പടിഞ്ഞാറൻ ഭാഗങ്ങളിൽ ഭാഗികമായി ചന്ദ്രഗ്രഹണം കാണാൻ സാധിക്കും. യുകെയിലും പടിഞ്ഞാറൻ യൂറോപ്പിലും, ചന്ദ്രഗ്രഹണത്തിന്റെ ചില ഭാഗങ്ങൾ മാത്രമേ കാണാൻ സാധിക്കുകയുളളൂ. ഇന്ത്യയിൽ സെപ്തംബർ ഏഴിന് ചന്ദ്രഗ്രഹണം രാത്രി 8.58ന് ആരംഭിച്ച് സെപ്​റ്റംബർ എട്ടിന് പുലർച്ചെ 1.25ന് അവസാനിക്കുമെന്ന് റിപ്പോർട്ടുണ്ട്. ഈ സമയത്ത് ചന്ദ്രൻ ചുവപ്പ് അല്ലെങ്കിൽ ഓറഞ്ച് നിറത്തിലായിരിക്കും കാണപ്പെടുക.

ബ്ലഡ് മൂൺ

സൂര്യനും ഭൂമിയും ചന്ദ്രനും ഒരു നേർരേഖയിൽ വരുമ്പോഴാണ് ചന്ദ്രഗ്രഹണം സംഭവിക്കുന്നത്. സാധാരണയായി സൂര്യപ്രകാശം ചന്ദ്രനെ പ്രകാശിപ്പിക്കുന്നു. എന്നാൽ ചന്ദ്രഗ്രഹണ സമയത്ത് ഭൂമി സൂര്യപ്രകാശത്തെ തടയുന്നു. ഗ്രഹണസമയത്ത് ചന്ദ്രനിൽ എത്തുന്ന ഏതൊരു സൂര്യപ്രകാശവും ചന്ദ്രനെ പ്രകാശിപ്പിക്കുന്നതിന് മുൻപ് ഭൂമിയുടെ അന്തരീക്ഷത്തിലൂടെ കടന്നുപോകും.

ചന്ദ്രനിൽ എത്തുന്നതിനു മുൻപ് ഭൂമിയുടെ അന്തരീക്ഷം സൂര്യപ്രകാശത്തെ അപവർത്തനം ചെയ്യുന്നു. ഇതോടെ സൂര്യപ്രകാശം കാരണം ചന്ദ്രനിൽ തിളക്കം അനുഭവപ്പെടും. ഭൂമിയുടെ നിഴൽ ചന്ദ്രന്റെ ഉപരിതലത്തെ പൂർണമായും മൂടുന്നതിനെയാണ് പൂർണ ചന്ദ്രഗ്രഹണം എന്ന് പറയുന്നത്. സൂര്യപ്രകാശം ചന്ദ്രനിൽ എത്തുന്നുണ്ടെങ്കിലും, അത് ആദ്യം ഭൂമിയുടെ അന്തരീക്ഷത്തിലൂടെ കടന്നുപോകുന്നു. ഇത് പ്രകാശത്തെ ക്രമീകരിക്കുന്നു. ഭൂമിയുടെ അന്തരീക്ഷം കുറഞ്ഞ തരംഗദൈർഘ്യമുളളവയെ പല ദിശയിലേക്ക് കടത്തി വിടുന്നതിനാൽ, ചുവന്ന നിറം മാത്രമേ ചന്ദ്രനിൽ പതിക്കാൻ കഴിയുളളൂ. ഇതാണ് ചന്ദ്രന്റെ നിറം ചുവപ്പായി മാറുന്നതിന് കാരണമാകുന്നത്.

ഇത് പ്രകടമാകുന്നത്
1. പെർത്ത്, ഓസ്‌ട്രേലിയ- സെപ്തംബർ എട്ടിന് പുലർച്ചെ ഒന്നരയ്ക്കും 2.52നുമിടയിൽ
2. ഇന്ത്യയിൽ (മുംബയിൽ) സെപ്തംബർ ഏഴിന് രാത്രി 11 മണിക്കും എട്ടിന് പുലർച്ചെ 12.22നുമിടയിൽ
3. കെയ്‌റോ, ഈജിപ്തിൽ സെപ്തംബർ ഏഴിന് രാത്രി എട്ടരയ്ക്കും 9.52നുമിടയിൽ
4. കേപ് ടൗൺ, ദക്ഷിണാഫ്രിക്കയിൽ സെപ്തംബർ ഏഴിന് രാത്രി ഏഴരയ്ക്കും 8.52നുമിടയിൽ
സൂര്യപ്രകാശം ഭൂമിയുടെ അന്തരീക്ഷത്തിലെത്തുമ്പോൾ, തരംഗദൈർഘ്യം കുറഞ്ഞ നീല പോലുളള നിറങ്ങൾ ചിതറി പോകുന്നു. ഇതാണ് പല രാജ്യങ്ങളിലും ബ്ലഡ് മൂണിന്റെ നിറം വ്യത്യസ്തമായി കാണാൻ കാരണമാകുന്നത്. അതേസമയം,​ പണ്ടത്തെയാളുകൾക്ക് ബ്ലഡ് മൂണിന് പിറകിലുളള ശാസ്ത്രീയ കാരണങ്ങൾ വ്യക്തമല്ലായിരുന്നു. അതിനാൽത്തന്നെ ബ്ലഡ് മൂൺ പ്രതിഭാസം സംഭവിക്കുമ്പോൾ ആളുകൾ ഭയപ്പെട്ടിരുന്നു. ലോകം നശിക്കാൻ പോകുന്നുവെന്ന തരത്തിലുളള ഭയങ്ങൾ അന്ന് ജനങ്ങൾക്കിടയിൽ നിലനിന്നിരുന്നു.