മാസം തോറും കിട്ടാൻ പോകുന്നത് 20,500 രൂപ; ജോലിയില്ലെങ്കിലും കാശ് അക്കൗണ്ടിലെത്തും, ടെൻഷനില്ലാതെ ജീവിക്കാം

ജോലിയിൽ നിന്ന് വിരമിച്ചാലും ഒരു വലിയ തുക മാസംതോറും നിങ്ങളുടെ അക്കൗണ്ടിൽ എത്തിയാലോ? അങ്ങനെയാണെങ്കിൽ കൂടുതൽ സാമ്പത്തിക ഭദ്രതയോടെ ജീവിക്കാൻ സാധിക്കുമല്ലോ? തപാൽ വകുപ്പിന്റെ അത്തരത്തിലുളള ഒരു നിക്ഷേപപദ്ധതിയാണ് സീനിയർ സി​റ്റിസൺ സേവിംഗ്സ് സ്‌കീം (എസ്‌സിഎസ്എസ്). മുതിർന്ന പൗരൻമാർക്ക് സുരക്ഷിതവും സ്ഥിരവുമായ ഒരു വരുമാനം ഉറപ്പാക്കാൻ സഹായിക്കുന്ന പദ്ധതിയാണിത്.

നിങ്ങൾ ജോലിയിൽ നിന്ന് വിരമിക്കുന്ന സമയത്ത് നിശ്ചിത തുക പദ്ധതിയിൽ നിക്ഷേപിക്കുകയാണെങ്കിൽ പ്രതിമാസം കൃത്യമായി ഒരു വരുമാനം ലഭിക്കും. എസ്‌സിഎസ്എസിലെ പലിശ നിരക്ക് 8.2 ശതമാനമാണ്. സർക്കാർ നിക്ഷേപപദ്ധതികളിൽ ഏ​റ്റവും ഉയർന്ന പലിശനിരക്കുളള പദ്ധതിയാണിത്. ഉദാഹരണത്തിന് ഈ പദ്ധതിയിൽ നിങ്ങൾ 30 ലക്ഷം നിക്ഷേപിക്കുകയാണെങ്കിൽ പ്രതിവർഷം ഏകദേശം 2,46,000 രൂപ വരെ പലിശ ലഭിക്കും. അതായത് മാസം തോറും 20,500 രൂപ നിങ്ങൾക്ക് പലിശയിനത്തിൽ മാത്രം അക്കൗണ്ടിലെത്തും.

15 ലക്ഷം രൂപയെങ്കിലും പദ്ധതിയിൽ പരമാവധി നിക്ഷേപിക്കേണ്ടതുണ്ട്. അഞ്ച് വർഷമാണ് കാലാവധി. ആദായനികുതി നിയമത്തിലെ സെക്ഷൻ 80 സി പ്രകാരം ഒരു വർഷത്തിൽ 1.5 ലക്ഷം രൂപ വരെ നികുതിയിളവും സ്വന്തമാക്കാം. കാലാവധി പൂർത്തിയാകുമ്പോൾ നിങ്ങളുടെ ആവശ്യകതയനുസരിച്ച് മൂന്ന് വർഷത്തേക്ക് കൂടി നീട്ടാവുന്നതാണ്. എന്നാൽ നിക്ഷേപ കാലാവധി പൂർത്തിയാകുന്നതിന് മുൻപ് നിങ്ങൾ പദ്ധതിയിൽ നിന്ന് പിൻമാറിയാൽ പിഴ അടയ്‌ക്കേണ്ടി വരും.

60ന് മുകളിൽ പ്രായമുളളവർക്കും 55നും 60നും ഇടയിൽ പ്രായമുളള വിരമിച്ച ജീവനക്കാർക്കും 50നും 60നും ഇടയിൽ പ്രായമുളള വിരമിച്ച പ്രതിരോധ ഉദ്യോഗസ്ഥർക്കും പദ്ധതിയിൽ ചേരാവുന്നതാണ്. അടുത്തുളള പോസ്‌​റ്റോഫീസിലോ ബാങ്കിലോ എത്തി ഈ പദ്ധതിയെക്കുറിച്ചുളള കൂടുതൽ വിവരങ്ങൾ മനസിലാക്കി ചേരാവുന്നതാണ്.