'ഇതൊന്നും വൃത്തിക്കും മെനക്കും ചെയ്യാൻ കഴിവുള്ള ആരും അവിടെ ഇല്ലേ'; പരിഹസിച്ച് സൗമ്യ  സരിൻ

തിരുവനന്തപുരം: ഡോ. പി സരിനെതിരെ എഡിറ്റ് ചെയ്ത ചിത്രങ്ങൾ സോഷ്യൽ മീഡിയയിൽ പ്രചരിപ്പിച്ചവർക്കെതിരെ ഭാര്യ സൗമ്യ സരിൻ രംഗത്ത്. തന്റെ ഫേസ്ബുക്ക് പോസ്റ്റിലൂടെയായിരുന്നു സൗമ്യയുടെ പ്രതികരണം. നടി റിനി ആൻ ജോർജിനൊപ്പം സരിൻ നിൽക്കുന്ന ചിത്രമാണ് എഡിറ്റ് ചെയ്തത്. ഒറ്റനോട്ടത്തിൽ തന്നെ ഇത് വ്യാജ ചിത്രങ്ങളാണെന്ന് മനസിലാകും. ഇത്രയും ക്വാളിറ്റി ഇല്ലാത്ത ഒരു തല വെട്ടി ഒട്ടിക്കൽ പിക് താൻ അടുത്ത കാലത്തൊന്നും കണ്ടിട്ടില്ലെന്നാണ് സൗമ്യ പ്രതികരിച്ചത്. ടീമിലേക്ക് പണി അറിയാവുന്ന കുറച്ചു പേരെ റിക്രൂട്ട് ചെയ്യണമെന്നും സൗമ്യ തന്റെ പോസ്റ്റിൽ കുറിച്ചു.

പോസ്റ്റിന്റെ പൂർണരൂപം

ഈ ഫോട്ടോ എന്റെ പോസ്റ്റുകൾക്ക് താഴെ തലങ്ങും വിലങ്ങും പോസ്റ്റുന്നവരോടാണ് കേട്ടോ. അയ്യേ. അയ്യയ്യേ. എന്തുവാടെ? എന്ന പണ്ണി വെച്ചിരിക്കെ??? ഇത്രയും ക്വാളിറ്റി ഇല്ലാത്ത ഒരു തല വെട്ടി ഒട്ടിക്കൽ പിക് ഞാൻ അടുത്ത കാലത്തൊന്നും കണ്ടിട്ടില്ല. ഇതൊന്നും വൃത്തിക്കും മെനക്കും ചെയ്യാൻ കഴിവുള്ള ആരും അവിടെ ഇല്ലേ? 1996 ഇൽ ഞാൻ കണ്ട ഇന്ദ്രപ്രസ്‌തം സിനിമയിൽ പോലും ഇതിലും അടിപൊളി ആയി ഇതൊക്കെ ചെയ്തു വെച്ചിട്ടുണ്ട്. അത്യാവശ്യമായി ടീമിലേക്ക് പണി അറിയാവുന്ന കുറച്ചു പേരെ റിക്രൂട്ട് ചെയ്യണം. പെട്ടെന്ന് തന്നെ. പണി കൂടാൻ പോകുകയല്ലേ. അപ്പോ പ്രൊഫഷെനൽ ക്വാളിറ്റി കളയാതെ നോക്കണം.

എന്ന്

ഒരു അഭ്യൂദയകാംക്ഷി