സപ്ലൈകോ ഓണം ഫെയർ: ഉദ്ഘാടനം ഇന്ന്

തിരുവനന്തപുരം: സപ്ലൈകോ ഓണം ഫെയറിന്റെ സംസ്ഥാനതല ഉദ്ഘാടനം ഇന്നു വൈകിട്ട് നാലിന് മുഖ്യമന്ത്രി പിണറായി വിജയൻ കിഴക്കേകോട്ട ഇ.കെ. നായനാർ പാർക്കിൽ നിർവഹിക്കും. മന്ത്രി ജി.ആർ. അനിൽ അദ്ധ്യക്ഷനാകും. ഓണത്തിനായി സപ്ലൈകോ രണ്ടര ലക്ഷത്തോളം ക്വിന്റൽ ഭക്ഷ്യധാന്യങ്ങൾ സംഭരിച്ചിട്ടുണ്ട്. ഓണക്കാലത്ത് സബ്സിഡി അരിക്കു പുറമേ കാർഡൊന്നിന് 20 കിലോ പച്ചരിയോ പുഴുക്കലരിയോ കിലോയ്ക്ക് 25 രൂപ നിരക്കിൽ ലഭ്യമാക്കും. സബ്സിഡി നിരക്കിൽ നൽകുന്ന മുളകിന്റെ അളവ് അര കിലോയിൽ ഒന്നാക്കി.

250ലധികം ബ്രാൻഡഡ് നിത്യോപയോഗ സാധനങ്ങൾക്ക് ഓഫറുകളും വിലക്കുറവും നൽകും. സെപ്തംബർ നാലു വരെയാണ് ജില്ലാ ഫെയറുകൾ. സഞ്ചരിക്കുന്ന ഓണച്ചന്തകളും ഒരുക്കിയിട്ടുണ്ട്.

വിറ്റുവരവ് 180 കോടി

ജൂലായിൽ 168 കോടിയുടെ വിറ്റുവരവാണ് സപ്ലൈകോയ്ക്ക് ഉണ്ടായത്. 60 കോടിയുടെ സബ്സിഡി ഉത്പന്നങ്ങൾ വിതരണം ചെയ്തു. ഈ മാസം 22വരെ വിറ്റുവരവ് 180 കോടി. ആഗസ്റ്റ് 11 മുതൽ പ്രതിദിന വിറ്റുവരവ് പത്തു കോടിക്ക് മുകളിലാണ്. 30 ലക്ഷത്തോളം ഉപഭോക്താക്കൾ എത്തി.