അമേരിക്കയിലെ സ്കൂളിൽ വീണ്ടും വെടിവയ്പ്,​ രണ്ട് കുട്ടികൾ കൊല്ലപ്പെട്ടു,​ 20 പേർക്ക് പരിക്ക്

വാഷിംഗ്ടൺ : അമേരിക്കയിലെ സ്കൂളിൽ യുവാവ് നടത്തിയ വെടിവയ്പിൽ രണ്ട് കുട്ടികൾ കൊല്ലപ്പെട്ടു. 20 പേർക്ക് പരിക്കേറ്റു. മിനിയാപൊളിസിലെ അനൻസിയേഷൻ കാത്തലിക് സ്കൂളിൽ രാവിലെ 8.45നാണ് വെടിവയ്പുണ്ടായത്. പരിക്കേറ്റവരിൽ ഭൂരിപക്ഷവും കുട്ടികളാണ്. ആക്രമണം നടത്തിയ യുവാവ് സ്വയം വെടിവച്ച് ജീവനൊടുക്കിയെന്ന് മിനിയാപൊളിസ് പൊലീസ് അറിയിച്ചു. കിന്റർഗാർട്ടൻ മുതൽ എട്ടാംഗ്രേഡ് വരെയുള്ള കുട്ടികൾ പഠിക്കുന്ന സ്കൂളിലാണ് ആക്രമണം ഉണ്ടായത്. യുവാവ് ജനാലകൾ വഴി കുട്ടികൾക്ക് നേരെ വെടിയുതിർക്കുകയായിരുന്നു. ക്ലാസ് തുടങ്ങുന്നതിന് മുമ്പ് കുട്ടികൾ പള്ളിയിൽ പ്രാർത്ഥനയിൽ പങ്കെടുക്കുമ്പോഴാണ് അക്രമി വെടിവച്ചതെന്നാണ് വിവരം.