ശിവഗിരിയിൽ ത്രിദിന പ്രഭാഷണപരമ്പര

ശിവഗിരി: സെപ്റ്റംബർ 25, 26, 27 തീയതികളിൽ ശിവഗിരിയിൽ പ്രഭാഷണപരമ്പര നടത്തും. ഗുരുദേവൻ ബോധാനന്ദ സ്വാമികളെ അനന്തരഗാമിയായി അഭിഷേകം ചെയ്തതിന്റെ ശതാബ്ദിയോടനുബന്ധിച്ച് ഗുരുദേവന്റെ ശിഷ്യന്മാരെക്കുറിച്ച് പ്രഭാഷണം നടത്തും. ഗുരുദേവൻ അനന്തരഗാമിയായി ബോധാനന്ദ സ്വാമികളെ അഭിഷേകം ചെയ്തത് സെപ്റ്റംബർ 27നാണ്. ആ സമയം സത്യവ്രതസ്വാമി, സഹോദരൻ അയ്യപ്പൻ തുടങ്ങിയവർ പ്രഭാഷണങ്ങൾ നടത്തിയിരുന്നു. അതിന്റെ സ്മരണയിലാണ് നൂറു ശിഷ്യന്മാരെക്കുറിച്ച് പ്രഭാഷണങ്ങൾ നടത്തുന്നത്. ആചാര്യ സ്മൃതിയായാണ് ശിവഗിരി മഠം പരിപാടി വിഭാവനം ചെയ്യുന്നത്. 25ന് ബോധാനന്ദസ്വാമിയുടെ 98-ാമത് മഹാസമാധിദിനമാണ്. ശ്രീനാരായണ മാസാചരണ ധർമ്മചര്യായജ്ഞത്തിന്റെ സമാപനദിനവും അന്നാണ്.

പ്രഭാഷണം നടത്താൻ താല്പ്പര്യമുള്ളവർ ശിവഗിരി മഠത്തിൽ പേര് രജിസ്റ്റർ ചെയ്യണം. ഏത് ഗുരുദേവ ശിഷ്യനെക്കുറിച്ചാണ് പ്രഭാഷണമെന്നത് മുൻകൂട്ടി അറിയിക്കണം. ഏറ്റവും നല്ല പ്രഭാഷണത്തിന് സർട്ടിഫിക്കറ്റും അവാർഡും നല്‍കുമെന്ന് ശ്രീനാരായണ ധർമ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ , ജനറൽ സെക്രട്ടറി സ്വാമി ശുഭാംഗാനന്ദ ,ട്രഷറർ സ്വാമിശാരദാനന്ദ , പ്രഭാഷണ കമ്മിറ്റി കൺവീനർ സ്വാമി അസംഗാനന്ദഗിരി എന്നിവർ അറിയിച്ചു. വിശദ വിവരങ്ങൾക്ക് കൺവീനർ, ബോധാനന്ദ സ്വാമി അഭിഷേക ശതാബ്ദി കമ്മിറ്റി, ശിവഗിരി മഠം, വർക്കല. ഫോൺ: 7012721492, 9447431833, 9496504181. ഇമെയിൽ: sivagirimutt@gmail.com.