ബ്രിട്ടീഷ് സൈന്യത്തിന്റെ സാഹസിക യാത്രയ്ക്കൊപ്പം ഇനി ഇന്ത്യൻ മോട്ടോർസൈക്കിൾ, ഉപയോഗിക്കുന്നത് 450സിസി ബൈക്കുകൾ

ലണ്ടൻ: ബ്രിട്ടീഷ് ആർമിയുമായി പുതിയ തന്ത്രപരമായ പങ്കാളിത്തം പ്രഖ്യാപിച്ചിരിക്കുകയാണ് റോയൽ എൻഫീൽഡിന്റെ യുണൈറ്റഡ് കിംഗ്ഡം വിഭാഗം. ഇതിന്റെ ഭാഗമായി, സൈനികരുടെ പരിശീലന ആവശ്യങ്ങൾക്കുള്ള റോയൽ എൻഫീൽഡിന്റെ നാല് മോ‌ഡലുകളിലുള്ള ഹിമാലയൻ 450 മോട്ടോർസൈക്കിളുകളാണ് നൽകുന്നത് . ബ്രിട്ടീഷ് ആർമി മോട്ടോറൈസ്ഡ് അഡ്വഞ്ചർ (എഎംഎ) ഗ്രൂപ്പിനാണ് ഈ മോട്ടോർസൈക്കിളുകൾ ലഭിക്കുക.

ഇതാദ്യമായല്ല റോയൽ എൻഫീൽഡും ബ്രിട്ടീഷ് ആർമിയും തമ്മിൽ ബന്ധമുണ്ടായിരുന്നത്. 1914 മുതൽ ബ്രിട്ടീഷ് ആർമി റോയൽ എൻഫീൽഡ് മെഷീനുകൾ ഉപയോഗിക്കുന്നുണ്ട്. രണ്ടാം ലോകമഹായുദ്ധകാലത്ത് സൈനികാവശ്യങ്ങൾക്കായി നിർമ്മിച്ച മോട്ടോർസൈക്കിളുകൾ, സൈക്കിളുകൾ, ജനറേറ്ററുകൾ തുടങ്ങിയവ ഇതിൽ ഉൾപ്പെടുന്നു. യുദ്ധത്തിൽ പ്രധാന പങ്ക് വഹിച്ച ഫ്ലൈയിംഗ് ഫ്ലീ ബൈക്കും ചരിത്രത്തിന്റെ ഭാഗമാണ്.

റോയൽ എൻഫീൽഡ് ഹിമാലയൻ 450-ന്റെ ഓഫ്-റോഡ് കഴിവുകളും സാഹസിക യാത്രകൾക്ക് അനുയോജ്യമായ രൂപകൽപ്പനയും പരിഗണിച്ചാണ് ബ്രിട്ടീഷ് ആർമി ഈ മോഡൽ തിരഞ്ഞെടുത്തിരിക്കുന്നത്. 452 സിസി സിംഗിൾ-സിലിണ്ടർ ലിക്വിഡ്-കൂൾഡ് എൻജിനാണ് ഇവയുടെ കരുത്ത്. ഈ എൻജിൻ 8,000 ആർപിഎമ്മിൽ 39 ബിഎച്ച്പി കരുത്തും 5,500 ആർപിഎമ്മിൽ 40 എൻ.എം ടോർക്കും ഉത്പാദിപ്പിക്കുന്ന 452 സി.സി സിംഗിൾ-സിലിണ്ടർ ലിക്വിഡ്-കൂൾഡ് എഞ്ചിനാണ് റോയൽ എൻഫീൽഡ് ഹിമാലയൻ 450 മോട്ടോർസൈക്കിളുകൾക്ക് ശക്തി പകരുന്നത്. ദീർഘദൂര യാത്രകൾക്ക് ആവശ്യമായ മികച്ച പ്രകടനമാണ് വാഗ്ദാനം ചെയ്യുന്നത്.

റോയൽ എൻഫീൽഡ് ഹിമാലയൻ 450-ൽ ഷോവയിൽ നിന്നുള്ള സസ്‌പെൻഷൻ സിസ്റ്റമാണ് ഉപയോഗിച്ചിരിക്കുന്നത്. ഇതിൽ 43 എംഎം അപ്‌സൈഡ്-ഡൗൺ ഫോർക്കുകളും ലിങ്ക്-ടൈപ്പ് റിയർ മോണോഷോക്കും ഉൾപ്പെടുന്നു. മുന്നിലും പിന്നിലും 200 എംഎം ട്രാവൽ വാഗ്ദാനം ചെയ്യുന്നു. ബ്രേക്കിംഗ് സിസ്റ്റത്തിൽ മുൻവശത്ത് 320 എംഎം പിന്നിൽ 270എംഎം റോട്ടറുകളാണുള്ളത്.