ഫോറസ്റ്റ് വാച്ചർ ഇനി ഫോറസ്റ്റ് ബീറ്റ് അസിസ്റ്റന്റ്

തിരുവനന്തപുരം: വനംവകുപ്പിലെ റിസർവ് വാച്ചർ/ ഫോറസ്റ്റ് വാച്ചർ/ഡിപ്പോ വാച്ചർ തസ്തികയുടെ പേര് 'ഫോറസ്റ്റ് ബീ​റ്റ് അസിസ്റ്റന്റ്' എന്ന് പരിഷ്‌കരിച്ച് സർക്കാർ ഉത്തരവിട്ടു. നിലവിലെ ഫോറസ്റ്റ് വാച്ചറുടെ ജോലി സ്വഭാവം, ഉത്തരവാദിത്വം എന്നിവയിൽ ഇളവ് വരുത്താൻ പാടില്ലെന്നും, പേരുമാ​റ്റത്തിന്റെ അടിസ്ഥാനത്തിൽ ഡിപ്പോ സൂക്ഷിപ്പ്, തൊണ്ടിമുതൽ സൂക്ഷിപ്പ് തുടങ്ങിയവയ്ക്ക് പുതിയ തസ്തികകൾ സൃഷ്ടിക്കാൻ പാടില്ലെന്നും, പുതിയ വേതനഘടനയ്ക്ക് ആവശ്യം ഉന്നയിക്കാൻ പാടില്ലെന്നുമുള്ള വ്യവസ്ഥയിലാണ് പേരുമാ​റ്റം. സർക്കാർ നടപടി സ്വാഗതം ചെയ്തതായി കേരള ഫോറസ്റ്റ് പൊട്ടക്ടീവ് സ്റ്റാഫ് അസോസിയേഷൻ സംസ്ഥാന പ്രസിഡന്റ് കെ.എ.സേതുമാധവൻ, ജനറൽ സെക്രട്ടറി ആർ.ദിൻഷ് എന്നിവർ അറിയിച്ചു.