കോൺഗ്രസ് നേതാവ് തങ്കച്ചന്റെ വീട്ടിൽ മദ്യവും സ്‌ഫോടക വസ്തുക്കളും വച്ച സംഭവം; കോൺഗ്രസ് നേതാവ് അറസ്റ്റിൽ

കൽപ്പറ്റ: കോൺഗ്രസ് നേതാവായ പുൽപ്പള്ളിയിലെ തങ്കച്ചന്റെ വീട്ടിൽ മദ്യവും സ്‌‌ഫോടക വസ്തുക്കളും വച്ച സംഭവത്തിൽ പ്രതിയായ പ്രാദേശിക കോൺഗ്രസ് നേതാവ് അറസ്റ്റിൽ. അനീഷ് മാമ്പള്ളിയാണ് പിടിയിലായത്. കർണാടകയിലെ കുശാൽ നഗറിൽ നിന്ന് വയനാട് പൊലീസ് ഇയാളെ കസ്റ്റഡിയിലെടുക്കുകയായിരുന്നു. ചോദ്യം ചെയ്യലിനുശേഷം നാളെ ഉച്ചയോടെ കോടതിയിൽ ഹാജരാക്കും.

തങ്കച്ചനെ കള്ളക്കേസിൽ കുടുക്കിയത് വിവാദമായതിന് പിന്നാലെ അനീഷ് ഒളിവിൽ പോയിരുന്നു. സംഭവത്തിനിടെ കോൺഗ്രസ് നേതാവ് ജോസ് നെല്ലേടം ആത്മഹത്യ ചെയ്തതും വിവാദമായിരുന്നു. സംഭവത്തിൽ ഗൂഢാലോചനാക്കേസിൽ പ്രതിയായതിന് പിന്നാലെ അനീഷിനെ കോൺഗ്രസ് സസ്‌പെൻഡ് ചെയ്തിരുന്നു. പാർട്ടിയിലെ ഗ്രൂപ്പ് പോരുകളുടെ പേരിലായിരുന്നു തങ്കച്ചന്റെ വീട്ടിൽ മദ്യവും സ്‌ഫോടക വസ്തുക്കളും വച്ചത്.